Nga Izet Mexhiti
E diel.
Çarshia ka një fytyrë krejt tjetër, nga ditët e zakonshme. Në kalldrëmin e saj të lashtë shtrihet dielli i ngrohtë i shtatorit, që me butësi përkëdhel muret e shtëpive të vjetra, portat e drunjta dhe hijet e minareve që zgjaten mbi gurë. Çdo hap në këtë ditë tingëllon më i ngadalshëm, më i qetë. Tregu pushon, por shpirti i Çarshisë mbetet i gjallë. Aroma e kafesë që del nga hani i vjetër përhapet lehtë nëpër rrugicat e gurta, të cilat duken sikur marrin frymë ngadalë, ndërsa sytë e qytetarëve që kalojnë aty, rrezatojnë dashuri për vendin e tyre.
Mes kësaj atmosfere pata rastin të takoj shumë qytetarë, që po shijonin madhështinë e Çarshisë. Por takimi më i veçantë ishte me profesorin dhe piktorin Imer Bajrami, figurë që prej dekadash është bërë njësh me artin, dhe këtë vend. Çdo ditë, i ulur mes kalldrëmeve, me brushën në dorë, ai pikturon jetën, dritën dhe shpirtin e Çarshisë.
Edhe sot, në këtë ditë qetësie, kur gjithçka dukej sikur kishte rënë në gjumë, vetëm një zë thyente heshtjen, zhurma e lehtë e brushës mbi kanavacë. Ajo tingëllonte si një melodi e fshehtë, një këngë që vetëm Çarshia mund ta kuptojë. Rrezet që binin pjerrtas mbi supet e tij, e bënin të dukej artistin tonë sikur ishte bërë pjesë e vetë pikturës së madhe, që quhet Çarshi.
Imeri është simbol i Çarshisë dhe i dashurisë së pastër për vendin. Në një botë që ndryshon me shpejtësi, ai qëndron i palëkundur, duke na kujtuar se arti është një formë e përjetshme besnikërie dhe jetese. Për këtë arsye ai është po aq pjesë e Çarshisë sa janë minaret krenare, dyqanet me dyer të drunjta dhe urat që lidhin shekujt mes tyre.
Kjo e diel e qetë, e pikturuar në pëlhurat e tij, na kujton se Çarshia nuk është veç vend tregtie. Por, është tempull i shpirtit, ku arti, historia dhe jeta e përditshme bashkohen në një të vetme. Dhe sot, zëri më i bukur i Çarshisë nuk ishte zhurma e tregut e as thirrjet e shitësve, por ritmi i qetë i brushës së profesorit, dhe ngrohtësia e rrugëve të Çarshisë!
Falemnderit për magjinë që na fal çdo ditë, Çarshia ime. Falemnderit për nderin që më jep të punoj e të të shërbej!
