Irani i ka bërë të ditur SHBA-së, përmes ndërmjetësve, se e refuzon propozimin me 15 pika të administratës Trump për negociata, raportoi të mërkurën Press TV, televizioni iranian në gjuhën angleze.
Oferta amerikane përfshin shumë elemente që Teherani i ka kundërshtuar vazhdimisht, por refuzimi i saj i plotë mund ta rrisë rrezikun e një përshkallëzimi të madh — përfshirë mundësinë që Trump të rikthejë kërcënimin e tij për të shkatërruar centralet elektrike iraniane.
Qëndrimi iranian, i cili u raportua edhe nga media të tjera iraniane dhe pro-iraniane në rajon, mund ta nxjerrë për momentin jashtë tavolinës përpjekjen amerikane për bisedime paqeje ballë për ballë këtë javë.
Një zyrtar i lartë iranian i tha Press TV se kushtet amerikane ishin “të tepruara” dhe se lufta do të përfundonte vetëm “sipas kushteve dhe afatit kohor të Teheranit”.
Zyrtari iranian i tha Press TV se Teherani e pa propozimin më të fundit të administratës Trump për zhvillimin e negociatave “si një manovër”.
Axios raportoi gjatë natës se Irani u kishte thënë ndërmjetësve se dyshonte që shtytja e Trumpit për bisedime paqeje ishte një mashtrim, duke pasur parasysh se SHBA-ja aktualisht po dërgon mijëra trupa në rajon.
Press TV raportoi se Irani ka pesë kushte për armëpushim dhe përfundimin e luftës:
Ndalimin e plotë të sulmeve dhe vrasjeve nga SHBA-ja dhe Izraeli.
Krijimin e mekanizmave për të garantuar që lufta të mos rifillojë.
Kompensim për dëmet e shkaktuara gjatë luftës.
Ndalimin e të gjitha sulmeve amerikane dhe izraelite kundër Hezbollahut në Liban dhe milicive pro-iraniane në Irak.
Marrjen e njohjes ndërkombëtare dhe garancive për autoritetin e Iranit mbi Ngushticën e Hormuzit./Axios
