Selena Gomez dhe Demi Lovato janë ribashkuar pas më shumë se një dekade, duke emocionuar fansat e tyre në mbarë botën.
Aktorja e serialit “Only Murders in the Building”, Selena Gomez, surprizoi publikun kur mori pjesë në koncertin hapës të turneut “It’s Not That Deep Tour” të Demi Lovato-s, i mbajtur në Orlando, Florida.
Ajo ndau momente nga mbrëmja në Instagram, përfshirë edhe një foto ku përqafon Lovato-n në prapaskenë.
Gomez u shpreh e prekur nga performanca e ish-mikeshës së saj, duke shkruar se ishte “në lot” dhe duke e cilësuar koncertin si një nga më të mirët që ka parë ndonjëherë. Ajo vlerësoi veçanërisht vokalin e Lovato-s, duke thënë se ishte “e mahnitur”.
Gjatë koncertit, një tjetër surprizë për fansat ishte paraqitja në skenë e Joe Jonas, i cili interpretoi së bashku me Lovato disa këngë nga koha e tyre në “Camp Rock”.
Selena Gomez dhe Demi Lovato njihen prej vitit 2002, kur luajtën së bashku në “Barney & Friends”. Ato u bënë shumë të afërta gjatë viteve në Disney, me Gomez në “Wizards of Waverly Place” dhe Lovato në “Sonny with a Chance”, si dhe bashkëpunuan në filmin “Princess Protection Program”.
Megjithatë, pas largimit nga Disney, marrëdhënia e tyre u ftoh. Në një intervistë të vitit 2020, Lovato kishte deklaruar se nuk ishin më shoqe, edhe pse theksonte se do të kishte gjithmonë dashuri dhe respekt për Gomez.
