Inxhinieri i softuerit përdori një llogari të quajtur “AlphaRaccoon” për të bërë një seri bastesh fitimprurëse mbi trendet e kërkimit, sipas një padie penale të sapo bërë publike.
Një inxhinier softueri në Google përdori në mënyrë të paligjshme informacione konfidenciale të kompanisë për të bërë një seri bastesh që i sollën rreth 1.2 milionë dollarë fitime në platformën online të parashikimeve Polymarket, pretendoi Departamenti Amerikan i Drejtësisë në një padi penale të publikuar të mërkurën.
Inxhinieri Michele Spagnuolo përdori të dhëna të brendshme mbi aktivitetin e kërkimeve në Google për të vendosur rreth 2.7 milionë dollarë baste mbi pyetjen se cilat figura publike do të shpalleshin ndër më të kërkuarat në vitin 2025, sipas padisë federale.
36-vjeçari italian përdori një llogari me emrin “AlphaRaccoon” për të bërë baste në fund të vitit të kaluar mbi faktin nëse dhe si figura të njohura, përfshirë këngëtarin D4vd dhe Papa Leo XIV, do të përfshiheshin në renditjet e publikuara nga Google në raportin e tij vjetor “Year in Search”, në dhjetor të vitit të kaluar.
“Ndryshe nga palët e tjera në këto transaksione, Spagnuolo e dinte rezultatin e këtyre basteve përpara publikut, sepse kishte akses në të dhënat e brendshme konfidenciale dhe me vlerë komerciale të Google”, thuhet në padi.
Spagnuolo, banues në Zvicër, u paraqit të mërkurën para një gjyqtari federal në Nju Jork, njoftoi Departamenti i Drejtësisë. Ai akuzohet për mashtrim me mallra financiare (commodities fraud), mashtrim elektronik (wire fraud) dhe pastrim parash.
Ky duket të jetë rasti i dytë kur Departamenti Amerikan i Drejtësisë akuzon një përdorues të tregjeve të parashikimit për një formë të tregtimit me informacion të brendshëm (insider trading).
Në prill, një ushtar i forcave speciale i përfshirë në kapjen e presidentit venezuelian Nicolás Maduro u akuzua se përdori informacione të klasifikuara për operacionin për të fituar rreth 400 mijë dollarë përmes një serie bastesh në Polymarket.
Polymarket dhe platforma rivale e tregjeve të parashikimit Kalshi kanë njohur rritje të madhe popullariteti gjatë dy viteve të fundit, pasi startup-et kanë tërhequr përdorues që vendosin para kundër njëri-tjetrit në tregje të ngjashme me bursën për ngjarje si zgjedhjet federale, vendimet qeveritare, sporti dhe martesat e personazheve të famshëm.
Platformat kanë tërhequr gjithashtu vëmendjen e Kongresit amerikan për shkak të stimujve që mund të krijojnë për njerëzit në biznes ose poste publike që të përdorin ndikimin apo informacionet e brendshme për të manipuluar gjasat e basteve. Senatorët amerikanë muajin e kaluar votuan unanimisht për t’ia ndaluar vetes pjesëmarrjen në tregjet e parashikimit.
Prokurori amerikan Jay Clayton tha në një deklaratë të publikuar të mërkurën se akuzat ndaj Spagnuolos tregojnë se mashtrimi në tregjet e parashikimit nuk do të tolerohet.
“Akuzat e sotme përforcojnë një mesazh prej dekadash: personat e brendshëm të korporatave nuk mund të përdorin informacione konfidenciale biznesi për të nxjerrë fitime në tregjet tona”, tha ai.
Sipas padisë, Spagnuolo përdori një mjet të brendshëm softuerik me mbishkrimin “Google Confidential” me tekst të kuq për të aksesuar të dhënat e kërkimeve përpara se kompania të publikonte raportin e saj vjetor mbi trendet e kërkimit.
Duke përdorur llogarinë AlphaRaccoon, Spagnuolo vendosi baste mbi të dhënat e “Year in Search” të Google nga tetori deri në dhjetor të vitit të kaluar. Ai e hoqi emrin nga llogaria pasi seria e fitoreve të tij bëri që përdorues të tjerë të Polymarket të spekulonin në Discord dhe X se llogaria i përkiste një punonjësi të Google me informacion të brendshëm.
Zëvendëskryetarja për çështje ligjore në Polymarket, Olivia Chalos, tha në një deklaratë se kompania bashkëpunoi ngushtë me zyrën e prokurorit federal për Distriktin Jugor të Nju Jorkut dhe me Komisionin për Tregtimin e Mallrave Futures (CFTC), agjencinë federale që rregullon tregjet e parashikimit.
“Jemi të përkushtuar për të ruajtur tregje të sakta, të drejta dhe transparente, si dhe për të zbatuar rregullat tona dhe për të bashkëpunuar me rregullatorët dhe organet e zbatimit të ligjit”, thuhet në deklaratë.
Polymarket publikoi gjithashtu një deklaratë në rrjetin X të mërkurën, ku dukej se i atribuonte ekipit të saj të brendshëm identifikimin fillestar të sjelljes së dyshuar mashtruese.
“Krenarë të njoftojmë se infrastruktura e integritetit të tregut të Polymarket sinjalizoi një tjetër tregtar që u arrestua këtë mëngjes në Nju Jork për insider trading”, thuhej në postim.
“Me 2 arrestime nga 2 raste në këtë industri që rezultojnë nga referimet tona penale, Polymarket është shfaqur si lider në zbatimin e ligjit”, shtoi kompania, duke iu referuar dukshëm edhe rastit të mëparshëm të ushtarit të forcave speciale./WP/TN
