Koment nga Christoph Ehrhardt
Irani dhe rebelët Huthi tani kërcënojnë dy ngushtica të rëndësishme detare në rajonin e Gjirit. Rrezikohet një bllokadë e gjatë.
Ajo që për një kohë të gjatë qarkullonte si shqetësim në qarqet diplomatike dhe të shërbimeve të inteligjencës, tani duket se është shndërruar në realitet të hidhur: rebelët Huthi po e shtrëngojnë darën edhe rreth një tjetër pike kyçe të tregtisë botërore dhe të eksporteve të energjisë – Bab al-Mandab-it, “Portës së Lotëve”.
Irani dhe aleatët e tij arabë të armatosur tani kërcënojnë njëkohësisht dy ngushtica me rëndësi strategjike në rajon. Dhe Huthët – ashtu si sponsorët e tyre kryesorë në Teheran – vështirë se do të heqin dorë kaq lehtë nga një avantazh i tillë. Ata zotërojnë si armët, ashtu edhe gatishmërinë për të përballuar kosto të mëdha, çka mund t’u mundësojë të mbajnë një bllokadë të gjatë.
Fushata e tanishme e pushtimeve është shumë më tepër sesa një demonstrim force brenda Jemenit. Ajo ilustron ngritjen e Huthëve nga një lëvizje rebele e periferisë së Jemenit verior në një aktor, ndikimi i të cilit shtrihet shumë përtej kufijve të vendit.
Gjithnjë e më shumë, zhvillimi i tyre të kujton atë të Hezbollahut libanez, dikur “xhevahiri i kurorës” së ushtrisë së fshehtë të drejtuar nga Garda Revolucionare iraniane.
Huthët janë shndërruar në një aktor të pavarur
Huthët janë shndërruar në një organizëm që është në gjendje të mbahet vetë. Ata kanë ngritur rrjete rajonale kontrabande që shtrihen deri në Somali dhe kanë zhvilluar aftësitë e tyre për prodhimin dhe përdorimin luftarak të dronëve.
Por, ndryshe nga milicia shiite libaneze, Huthët nuk janë një krijesë e Iranit që ndjek verbërisht urdhrat nga Teherani. Ata janë të verbuar ideologjikisht, por kanë vullnetin e tyre.
Në këtë moment, Garda Revolucionare iraniane vështirë se mund të kishte ëndërruar zhvillime më të favorshme në Jemen. Kjo edhe për faktin se vendi po shndërrohet gjithnjë e më shumë në një makth për rivalin e Iranit, Arabinë Saudite.
Riadi dhe aleatët e tij jemenas nuk janë në gjendje ta përballojnë të vetëm kërcënimin e Huthëve.
Por mbretëria saudite është prishur për shkak të Jemenit me një aleat të rëndësishëm, Emiratet e Bashkuara Arabe, të cilat nuk tregojnë ndonjë dëshirë të madhe për t’u dalë në ndihmë vëllezërve të tyre sauditë.
Ajo që realisht mund t’ua fusë frikën Huthëve dhe t’u shkaktojë dhimbje do të ishte ushtria amerikane.
Por ajo ka një komandant suprem të paparashikueshëm.
Burimi: F.A.Z.
