Në ditën e katërt, TEKNOFEST Güneydoğu i mirëpret vizitorët me një sërë aktivitetesh, nga shfaqjet ajrore te industria e mbrojtjes, nga inteligjenca artificiale te teknologjitë vendëse.
FESTË E TEKNOLOGJISË DHE AVIACIONIT NË ŞANLIURFA
TEKNOFEST Güneydoğu vazhdon t’i mirëpresë vizitorët në aeroportin GAP të Şanlıurfas.
Në festival ekspozohen projekte të shumta, nga shfaqjet ajrore dhe produktet e industrisë së mbrojtjes te inteligjenca artificiale, teknologjitë shëndetësore dhe projektet e prodhimit vendës. Ndërkohë, atmosfera festive vazhdon me koncerte dhe aktivitete të tjera.
MOTOR HIBRID I PRODHUAR NË VEND NË TEKNOFEST
OYAK HORSE ekspozoi në TEKNOFEST Güneydoğu motorin hibrid HORSE H18, me vëllim 1,8 litra, të prodhuar në fabrikën e saj në Bursa.
Krahas motorit, i cili së bashku me sistemin hibrid zhvillon deri në 160 kuaj fuqi, vizitorëve iu prezantuan edhe përbërës të sistemit të transmetimit të fuqisë, si kutia e shpejtësive, motori elektrik dhe bateria.
Drejtori i përgjithshëm i OYAK HORSE Türkiye, Kadir Biçer, tha se 75 për qind e prodhimit në Turqi eksportohet dhe se po vazhdojnë punimet e kërkimit dhe zhvillimit për përdorimin e motorëve dhe kutive të shpejtësive në mjete dhe sektorë të ndryshëm.
PRODHIMI NË SERI I TAYFUN BLOK-3 DO TË NISË KËTË VIT
Drejtori i përgjithshëm i ROKETSAN-it, Murat İkinci, prezantoi në TEKNOFEST Güneydoğu zhvillimet më të fundit në familjen e raketave TAYFUN. Duke thënë se prodhimi në seri dhe dorëzimet e TAYFUN Blok-2 vazhdojnë, İkinci deklaroi se puna për Blok-3 është drejt përfundimit.
İkinci tha: «Jemi drejt përfundimit të veprimtarive të nevojshme për prodhimin në seri të TAYFUN Blok-3. Edhe prodhimi i tyre në seri do të nisë këtë vit, do të nisin edhe dorëzimet».
«YJET TURKE» U BËJNË THIRRJE TË RINJVE T’I DREJTOHEN AVIACIONIT
Ekipi akrobatik i Forcave Ajrore Turke, «Yjet Turke», zhvilloi një shfaqje ajrore mbi Şanlıurfa në kuadër të TEKNOFEST Güneydoğu.
Pas shfaqjes, pilotët u bënë thirrje fëmijëve dhe të rinjve të interesohen për aviacionin dhe të ndjekin ëndrrat e tyre.
Oficeri për shtypin dhe marrëdhëniet me publikun i «Yjeve Turke», kapiteni Fatih Sağlam, tha: «Nëse një fëmijë që e ndoqi sot këtu shfaqjen tonë bëhet pilot në të ardhmen, kjo do të jetë shpërblimi më kuptimplotë për punën që bëjmë».
Ndërsa togeri pilot Berkalp Bilgi i këshilloi të rinjtë të punojnë shumë dhe të mos heqin dorë nga ëndrrat e tyre.
STUDENTË TURQ TË INXHINIERISË QË JETOJNË JASHTË VENDIT NË TEKNOFEST
Studentë turq të inxhinierisë dhe të zhvillimit të softuerit, që jetojnë jashtë vendit, vizituan TEKNOFEST Güneydoğu pasi përfunduan praktikat në kompanitë e industrisë së mbrojtjes në Turqi.
U bë e ditur se, përmes programit «Praktikat në Turqi» të YTB-së, deri më sot janë sjellë në Turqi rreth 750 të rinj.
Bilal Ünal, i ardhur nga Belgjika, tha se pas përfundimit të studimeve master po mendon të kthehet në Turqi dhe të punojë në industrinë e mbrojtjes.
BOTA E BLETËS KAUKAZIANE U SOLL NË REALITETIN VIRTUAL
Bleta kaukaziane, një nga pasuritë e rëndësishme natyrore të Ardahanit, u ndërthur me teknologjinë në TEKNOFEST Güneydoğu. Përmes aplikacionit tredimensional të realitetit virtual (VR), të zhvilluar nga Drejtoria e Qendrës së Prodhimit, Trajnimit dhe Gjeneve të Bletës Kaukaziane, vizitorët patën mundësinë të përjetojnë jetën e një blete mjalti brenda kosheres dhe veprimtarinë e saj në natyrë.
Aplikacioni paraqiti në tri përmasa mënyrën e organizimit të punës së bletëve dhe proceset e mbledhjes së nektarit dhe polenit. Synimi ishte që veçanërisht fëmijëve dhe të rinjve t’u shpjegohej rëndësia e bletëve në ekosistem.
KONCERT I CEZA-S NË TEKNOFEST
Krahas aktiviteteve të teknologjisë dhe aviacionit, edhe koncertet tërhoqën interesimin e vizitorëve në TEKNOFEST Güneydoğu. Ceza, një nga emrat kryesorë të muzikës rap turke, u ngjit në skenë në Şanlıurfa në kuadër të festivalit.
Vizitorët që mbushën hapësirën e festivalit kënduan së bashku me Ceza-n këngët e tij të njohura, duke krijuar një atmosferë plot gjallëri gjatë koncertit. Pas aktiviteteve që zgjatën gjithë ditën, performanca e Ceza-s e vijoi atmosferën festive të TEKNOFEST Güneydoğu edhe në orët e mbrëmjes./NTV
