Ballina Kultura Iku në amshim poeti dervenas Sami Sherifi

Iku në amshim poeti dervenas Sami Sherifi

Sot paradite si pasojë e një ataku kardiak ka ndërruar jetë poeti  Sami Sherifi.

Ai njihej në Shkup dhe në të gjitha trojet shqiptare, por dhe në diasporë, si një veprimtar i palodhur i çështjes kombëtare. Ishte adhurues i letërsisë së bukur shqipe, por edhe poet i njohur.

Ka qenë themelues dhe kryetar i klubit poetik “ABC Poetike” Shkup që vepronte në të gjitha trojet shqiptare. Varrimi i të ndjerit u bë sot në varrezat e fshatit Sfillare./Derveni.info

NEHAT JAHIU
EDHE TI NA PASKE IKUR, O POET…
( Mikut dhe poetit Sami Sherifi)

Ah, sa shumë më preku thellë në shpirt ky lajm për ty
Ofshana ca herë dhe lotët më shpërthyen në sy
Oh, Zot unë sot me këtë lajm të hidhur u pikëllova
Me dhimbje pafund për ikjen tënde u trishtova.

Më thanë se shpirti yt, o mik sot paska ikur nga dera pragut
E në gjysmën e poezisë të paska mbetur ty fjala e vargut
Eh, poet o miku im në librin e dhimbjes sime paske ngrirë
Na paske ikur, o mik pa na thënë fjalën tënde lamtumirë.

As vetë nuk e di këtë lajm tani se si ma priti shpirti
Kur mora lajmin e zi se paska vdekur poeti Sami Sherifi
Ti miku im poet sa shumë sot në këtë ditë më pikëllove
E këtë ditë papritur, o miku im në pikëllim ma shndërrove.

Ti sot, o miku im na paske ikur në jetën e botën e amshuar
E unë kujtimet për ty në shpirt tim përjetësisht do t`i ruaj
Miku im poet Sami Sherifi unë kurrë ty s`mund të harroj
Me mall e dashuri, o miku im poet, ty do të të përkujtoj.

Tani me dhembje i pikëlluar në shpirt të them lamtumirë
O, miku im i dashur, o poet me shpirtin e madh dhe të lirë
Prehu i qetë në këtë dhe, në tokën ku rreh zemra arbërore
Që me vargun e poezisë gjithnjë me shpirt ti e përqafove.

Nehat Jahiu,
Orizare, 13. 11. 2020