Rusia ka reaguar ashpër ndaj deklaratave të fundit të presidentit amerikan Donald Trump, i cili i ka dhënë një ultimatum Moskës për të ndalur luftën në Ukrainë brenda 50 ditëve, në të kundërt ka paralajmëruar sanksione të reja dhe rritje të ndihmës ushtarake për Kievin.
Ministria e Jashtme ruse reagoi të enjten përmes zëdhënëses Maria Zakharova, duke e cilësuar qasjen e Trump si të papranueshme:
“Rusia nuk pranon kërcënime,” tha ajo prerazi.
Duke komentuar zotimin e Trump për të furnizuar Ukrainën me raketa dhe armë të tjera të avancuara, Zakharova e quajti vendimin “sinjal për vijimin e masakrës” dhe një refuzim i hapur ndaj çdo përpjekjeje për paqe.
Ajo theksoi se bisedimet mes Moskës dhe Kievit janë të bllokuara, duke fajësuar Ukrainën për mungesë vullneti:
“Kievi ose po shmang, ose ende nuk ka vendosur për një raund të ri negociatash,” u shpreh Zakharova.
Situata vjen në një moment kritik për luftën në Ukrainë, me tensionet mes fuqive perëndimore dhe Rusisë që po rriten ndjeshëm. Deklaratat e Trump, që synojnë të forcojnë pozicionin amerikan në konflikt, kanë hapur një tjetër front diplomatik përballë Moskës, e cila e interpreton retorikën amerikane si provokim dhe shtyrje drejt përshkallëzimit të luftës.
