Të tjera komunikime janë bërë publike nga dosja hetimore e Belinda Ballukut. Nga aparati celular i ish kreut të ARRSH, Evis Berberi janë zbërthyer të gjitha mesazhet që fundosën Belinda Ballukun.
Më 10 shtator 2021, në orën 10:46, Balluku i shkruan Berberit: “Hajde tek unë në 11”, dhe Berberi i kthen përgjigje menjëherë: “Erdha”.
Rreth orës 13:00, Balluku e udhëzon Berberin: “Prite pak Ilir Shtufin e Nova dhe bëja të qartë që shkon me EUT. Dhe mos ta shoh në vend tjetër. Punët i ke me Gim thuaj, jo me mua.”
Berberi konfirmon: “Ok.”
Vetëm pak minuta pas mesazheve, në orën 13:54, Ilir Shtufi i shkruan Berberit: “Përshëndetje si të kam… Ilir Shtufi Nova jam. Të tak pak, më kanë thënë kur mundesh.”
Berberi i përgjigjet në 14:07: “Hajde kalo.” Shtufi konfirmon: “Ok, 10 min.”
Në mbrëmje, komunikimi vijon mbi publikimet mediatike dhe rrjedhjen e informacionit, ku Balluku i kërkon Berberit të gjejë kush e ka nxjerrë listën fituese.
Balluku shkruan në orën 21:44: “Ke një Miranda tek prokurimet.
Berberi mohon rrjedhje informacioni: “Miranda ka qenë tërë kohës te prokurimet. Miranda s’ka dijeni për emrat.”
Balluku i kthehet: “Po mirë, gjeje kush.”Berberi pretendon se lista nuk ka si të jetë marrë nga askush: “Asnjë se ka listën, s’ka si ta kenë… Vetëm po të kenë qëlluar me hamendësim, se edhe sot kishte ndryshime. Vetëm unë e di.”
Sipas hetimit, vetëm katër ditë pas këtyre komunikimeve, më 14.09.2021, shoqëria “Nova Construction 2012”, në pronësi të Ilir Shtufit, lidh një kontratë bashkëpunimi me “Euroteorema Peqin” dhe “PE-VLA-KU”, për të marrë pjesë në tenderin e Lotit 4 të Unazës së Jashtme Tiranë.
