Pas hapjes së mijëra kasafortave në një degë të Sparkasse në Gelsenkirchen, hetuesit po ndjekin dhjetëra pista që mund të çojnë te autorët. Sipas policisë, autorët dyshohet se kanë përdorur të paktën dy automjete.
Pas grabitjes spektakolare milionëshe në një degë të Sparkasse në Gelsenkirchen, autoritetet kanë marrë dhjetëra informacione nga qytetarët lidhur me autorët. “Këto pista po shqyrtohen aktualisht”, deklaroi një zëdhënës i policisë. Në veçanti po analizohen pamje nga kamerat e sigurisë të një parkingu aty pranë, ku shihen persona të maskuar dhe dy automjete.
Sipas pamjeve të kamerave të sigurisë, është regjistruar jo vetëm një automjet i zi me fuqi të lartë motorike, por edhe një furgon i bardhë, i cili dyshohet se është përdorur nga autorët. Në pamjet e publikuara nga gazetat “WAZ” dhe “Bild”, shihet një person i maskuar duke ngritur një barrierë parkimi, ndërsa një tjetër qëndron pranë një aparati për pagesën e parkimit.
Në makinë ndodheshin pesë persona të maskuar
“Videot janë të njohura për ne dhe janë pjesë e hetimeve”, tha zëdhënësi i policisë. Sipas tij, pamjet janë shpërndarë në një grup WhatsApp, ku janë bashkuar persona të prekur nga rasti. Për arsye taktike hetimore, policia nuk dha detaje të tjera dhe u bëri thirrje dëshmitarëve që informacionet t’i dorëzojnë drejtpërdrejt autoriteteve, e jo t’i publikojnë në rrjetet sociale.
Autoritetet kishin njoftuar që të martën se kamerat e parkimit kishin regjistruar një automjet të zi me targa të vjedhura në Hanover. Në makinë ndodheshin persona të maskuar. Po ashtu, dëshmitarë kishin parë disa burra me çanta të mëdha në shkallët e parkimit gjatë natës nga e shtuna në të dielën.
“Këtu kanë vepruar profesionistë”
Grabitja e madhe në lagjen Buer u zbulua herët të hënën në mëngjes, pasi u aktivizua alarmi i zjarrit. Sipas hetimeve të para, autorët kishin hyrë fillimisht përmes parkingut, më pas përmes disa dyerve, deri në një dhomë arkivi, nga ku me një mjet special shpimi depërtuan në dhomën e kasafortave. Aty ata hapën pothuajse të gjitha 3.250 kasafortat e klientëve. “Këtu kanë vepruar profesionistë”, tha zëdhënësi i policisë.
Fillimisht, dëmi ishte vlerësuar rreth 30 milionë euro, por shuma reale mund të jetë edhe më e lartë. Numri i të dëmtuarve llogaritet mbi 2.500 persona. “Ne flasim për një shumë në dhjetëra milionë euro”, deklaroi policia. Nëse konfirmohet, kjo do të ishte një nga grabitjet më të mëdha në historinë kriminale të Gjermanisë.
