Shtetet e Bashkuara kanë ndaluar një anije kineze që shkonte për në Iran me një ngarkesë ushtarake, raporton The Wall Street Journal . Sipas gazetës amerikane, forcat speciale amerikane hipën në anije muajin e kaluar disa qindra milje detare larg brigjeve të Sri Lankës në Oqeanin Indian. Uashingtoni e kishte vënë në shënjestër anijen për ca kohë, sipas gazetës.
Kjo është hera e parë në vite që ushtria amerikane ka ndaluar një anije kineze që shkonte për në Iran. Forcat speciale sekuestruan ngarkesën e anijes dhe më pas e lejuan atë të vazhdonte udhëtimin e saj. Ngarkesa thuhet se përmbante mallra me përdorim të dyfishtë, të afta të përdoren si për qëllime civile ashtu edhe për ushtarake. Sipas një burimi të lartë amerikan, ato ishin të destinuara për kompanitë iraniane të përfshira në zhvillimin e raketave. Ngarkesa u shkatërrua.
Muajin e kaluar, dy politikanë demokratë i bënë thirrje Sekretarit të Shtetit të SHBA-së, Marco Rubio, dhe Drejtorit të CIA-s, John Ratcliffe, të hetonin një kompani kineze që ka furnizuar Iranin me më shumë se 2,000 ton perklorat natriumi që nga shtatori. Ky kimikat është thelbësor për prodhimin e lëndës djegëse për raketat balistike. Dërgesat shkelin sanksionet e Kombeve të Bashkuara kundër Iranit./TetovaNews
