Pas hyrjes në fuqi të marrëveshjes së integrimit të nënshkruar mes Ushtrisë Siriane dhe organizatës kurde YPG, politika e ndjekur nga Presidenti Recep Tayyip Erdoğan për Sirinë është bërë kryefjalë jo vetëm në Turqi, por edhe në mediat e Lindjes së Mesme.
Përmbledhje e shpejtë
Ushtria Siriane ka ndalur operacionet ushtarake në zonat në perëndim të lumit Eufrat që ishin nën kontrollin e YPG/SDG.
Pas armëpushimit dhe marrëveshjes së integrimit mes Damaskut dhe YPG/SDG, tensioni në vijat e frontit ka rënë dhe në rajon mbizotëron qetësia.
Sipas agjencisë shtetërore siriane SANA, Presidenti i Sirisë Ahmed al-Sharaa ka nënshkruar marrëveshjen që parashikon armëpushimin dhe integrimin e plotë të YPG/SDG në strukturën shtetërore.
Para marrëveshjes, më 13 janar ushtria siriane kishte shpallur “zonë ushtarake” territoret në perëndim të Eufratit dhe më 15 janar kishte nisur operacionet pas evakuimit të civilëve.
Ushtria siriane avancoi me shpejtësi deri në Raka, duke e marrë nën kontroll qytetin, çka e detyroi organizatën terroriste të pranonte marrëveshjen.
Analiza e gazetarit egjiptian për Turqinë dhe Erdoğanin
Kryeredaktori i gazetës egjiptiane El-Masryûn, Cemal Sultan, i vlerësoi zhvillimet nga këndvështrimi i Turqisë.
Sultan thekson se Presidenti Recep Tayyip Erdoğan dhe ekipi i tij kanë ndjekur në dosjen siriane një qasje të bazuar në durim strategjik, diplomaci të heshtur dhe hapa të llogaritur me kujdes, duke e cilësuar këtë si një “shkollë taktike politike”.
Sipas tij, fakti që procesi ndaj YPG/SDG dhe PKK-së në lindje të Sirisë është shndërruar në një operacion të brendshëm të ushtrisë siriane për mbrojtjen e integritetit territorial të vendit, përbën për Turqinë jo vetëm një fitore ushtarake dhe të sigurisë, por edhe një fitore të rëndësishme politike.
Ky proces, thekson Sultan, mbështet vizionin e Ankarasë për “Turqi pa terror”, duke kontribuar edhe në parandalimin e tensioneve dhe dobësive në politikën e brendshme.
Nga analiza e plotë e Cemal Sultanit:
Durimi strategjik i Erdoğanit dhe ekipit të tij – Hakan Fidan, İbrahim Kalın dhe Nuh Yılmaz – në çështjet komplekse të Sirisë përfaqëson një model veprimi të zgjuar, të heshtur, pa zhurmë dhe pa demonstrime, me hapa të llogaritur mirë dhe me ndërtim të qëndrueshëm të besimit me aleatët.
Operacioni për pastrimin e YPG/SDG dhe PKK-së në lindje të Sirisë është kthyer tashmë në një operacion të brendshëm të ushtrisë siriane për mbrojtjen e sovranitetit territorial.
Kjo përbën për Turqinë jo vetëm një fitore historike ushtarake dhe të sigurisë, por edhe një fitore politike që pengon përplasjet e brendshme, parandalon provokimin e popullsisë kurde dhe mbështet drejtpërdrejt vizionin e Presidentit për një “Turqi pa terror”.
Presidenti Erdoğan e sheh këtë proces si një hap kyç drejt realizimit të një Kushtetute të re, për mbylljen e epokës së kushtetutës ushtarake dhe ndërtimin e një shteti modern, demokratik dhe civil.
Qëndrimet e Presidentit Erdoğan për Sirinë
Pas nisjes së konfliktit në Siri në vitin 2011, Turqia u përball me një valë të madhe emigracioni. Duke ikur nga masakrat e regjimit të Asadit, miliona sirianë u pritën nga Turqia, e cila zbatoi deri në fund detyrimet e fqinjësisë dhe humanizmit.
Gjatë 15 viteve, qëndrimi dhe deklaratat e Presidentit Erdoğan kanë qenë të qarta:
regjimi i Asadit do të largohej dhe në Siri nuk do të lejohej as copëtimi i vendit, as projektet shtetërore të grupeve terroriste.
Edhe në periudha kur opozita e brendshme e përdori çështjen e refugjatëve për përfitime elektorale, Erdoğan nuk hoqi dorë nga politika e tij, duke theksuar se asnjë refugjat nuk do t’i dorëzohej regjimit të Baasit.
Në dhjetor 2024, forcat revolucionare rrëzuan regjimin e Asadit. Udhëheqësi i ri, Ahmed al-Sharaa, deklaroi se nuk do të tolerohej asnjë organizatë terroriste dhe nisi operacione ushtarake kundër YPG-së.
Më 18 janar, shpallja zyrtare e përfundimit de facto të YPG-së në Siri u bë përmes marrëveshjes së integrimit të njoftuar nga Presidenti al-Sharaa.
Trump: “Sirinë e shpëtoi Erdoğan”
Gjatë një konference për shtyp në SHBA me Kryeministrin izraelit Benjamin Netanyahu, Presidenti amerikan Donald Trump deklaroi:
“Presidenti Erdoğan na ndihmoi të shpëtonim nga një udhëheqës shumë i keq në Siri. Është e vështirë t’i japësh hakun, por duhet pranuar: Erdoğan e shpëtoi Sirinë.”/TetovaNews
