Në Spitalin Klinik të Tetovës janë ndarë 109 vendime pune për kuadrin që prej kohësh ka qenë i angazhuar në këtë institucion shëndetësor, ndërsa me 36 vendimet e ndara më herët, numri i punonjësve të cilëve u është rregulluar statusi i punës ka arritur në 145.
Ndarja e vendimeve u bë të martën, më 25 gusht, në Spitalin Klinik të Tetovës. Në aktivitet morën pjesë, ndër të tjera, kryetari i Komunës së Tetovës, Bilall Kasami, Izet Mexhiti dhe drejtori i Spitalit Klinik të Tetovës, Erzen Elezi.
Detajet për strukturën e kuadrit që përfshihet në këtë proces i bëri të ditura Mexhiti. Sipas tij, 109 personat nuk janë kuadër që po fillon për herë të parë punën në spital, por punonjës që tashmë kanë qenë të angazhuar në institucion dhe që tani kanë marrë vendimet e tyre të punës.
“Bashkë me 36 vendimet e ndara më herët, 145 pjesëtarë të stafit tashmë e kanë të rregulluar statusin e tyre të punës”, deklaroi Mexhiti.
Pjesa më e madhe e vendimeve u përkasin profileve mjekësore dhe shëndetësore, përfshirë mjekë, laborantë, biokimistë, infermierë dhe kuadro të tjera të nevojshme për funksionimin e Spitalit Klinik të Tetovës.
Në kuadër të procesit përfshihen edhe 28 specializantë dhe 10 punëtorë teknikë.
Mexhiti paralajmëroi se procesi i plotësimit të nevojave kadrovike të spitalit do të vazhdojë. Sipas tij, gjatë muajit shtator pritet të hapen edhe vende të reja pune për specializantë, ndihmës-infermierë dhe personel të administratës.
“Po punojmë që Spitali Klinik i Tetovës të ketë kuadrin që i nevojitet dhe qytetarët të marrin shërbimin shëndetësor që meritojnë”, tha Mexhiti.
Edhe kryetari i Komunës së Tetovës, Bilall Kasami, përshëndeti ndarjen e 109 vendimeve, duke e cilësuar fuqizimin e kapaciteteve njerëzore të spitalit si investim në përmirësimin e shërbimeve shëndetësore për qytetarët e Tetovës dhe të rajonit të Pollogut.
Kasami i përgëzoi profesionistët shëndetësorë që morën vendimet dhe u uroi punë të mbarë.
“Investimi në njerëz dhe në shëndetësi është investim në të ardhmen e qytetit tonë. Do të vazhdojmë të punojmë që Spitali i Tetovës të ketë kuadrin, kushtet dhe kapacitetet që meritojnë qytetarët tanë”, deklaroi Kasami.
Ai paralajmëroi gjithashtu se së shpejti pritet edhe rikonstruksioni i plotë i Spitalit të Tetovës, megjithëse deri tani nuk janë bërë publike hollësi konkrete për datën e fillimit të punimeve, vlerën e investimit apo afatin e realizimit të projektit.
Ceremonia për ndarjen e 109 vendimeve ishte paralajmëruar paraprakisht të zhvillohej në amfiteatrin e Spitalit Klinik të Tetovës. Raportimet e publikuara para aktivitetit e kishin përshkruar procesin si ndarje vendimesh për “të punësuar të rinj”, por deklarata e mëvonshme e Mexhitit sqaron se bëhet fjalë kryesisht për rregullimin e statusit të personelit që tashmë ka qenë i angazhuar në spital.
Me rregullimin e statusit të 145 pjesëtarëve të stafit dhe paralajmërimin për punësime të tjera gjatë shtatorit, drejtuesit politikë dhe institucionalë thonë se synimi është forcimi i kapaciteteve njerëzore të Spitalit Klinik të Tetovës dhe përmirësimi i shërbimeve për pacientët nga Tetova dhe i gjithë rajoni i Pollogut.
