Trump paralajmëron Iranin për vendosjen e minave
Marina amerikane ka pastruar të gjitha minat nga korsia kryesore e lundrimit në Ngushticën e Hormuzit, deklaroi të martën presidenti Donald Trump.
Pse ka rëndësi: Pastrimi i minave, pjesë e një operacioni të zhvilluar pa shumë publicitet gjatë disa muajve të fundit, do të mundësojë kalimin e një numri dukshëm më të madh cisternash nafte përmes ngushticës.
Heqja e minave zvogëlon fuqinë e Iranit për të ushtruar presion mbi tregjet globale të energjisë, si dhe pozicionin e tij në çdo negociatë të ardhshme me administratën Trump.
Kjo gjithashtu e bën shumë më pak të rëndësishëm projekt-marrëveshjen që Irani dhe Omani kanë negociuar prej muajsh.
Çfarë po thotë Trump: “Sapo jam informuar nga Marina e Shteteve të Bashkuara se të gjitha minat janë hequr dhe/ose janë asgjësuar nga ujërat ndërkombëtare të Ngushticës së Hormuzit”, shkroi Trump në Truth Social.
Trump shtoi se Irani është njoftuar se çdo anije ose mjet lundrues që vendos mina të reja do të “shkatërrohet menjëherë dhe në mënyrë sistematike”.
Ai tha se Forca Hapësinore e SHBA-së po e monitoron nga afër ngushticën.
“Politika e tolerancës zero ndaj vendosjes së minave është plotësisht në fuqi dhe po zbatohet”, shkroi Trump.
Në prapaskenë: Dy zyrtarë amerikanë me njohuri të drejtpërdrejta për çështjen konfirmuan njoftimin e Trumpit dhe thanë se Marina amerikane ka pastruar Skemën e Ndarjes së Trafikut (Traffic Separation Scheme – TSS), korsinë qendrore të ngushticës, e cila ndodhet pikërisht ndërmjet Omanit dhe Iranit.
Irani kishte vendosur dhjetëra mina në korsinë qendrore gjatë luftës, duke krijuar një rrezik të madh për anijet. Teherani ishte zotuar t’i hiqte minat si pjesë e memorandumit të mirëkuptimit të arritur gjatë verës me Shtetet e Bashkuara. Por memorandumi dështoi dhe minat nuk u hoqën.
Gjatë disa muajve të fundit, dronët nënujorë të Marinës amerikane kanë skanuar sistematikisht zonën dhe kanë lokalizuar më shumë se 100 objekte që dyshohej se ishin mina.
Ushtria amerikane kontraktoi kompani private për t’i hequr ose asgjësuar minat.
Situata aktuale: Pastrimi i korsisë qendrore në Ngushticën e Hormuzit ndodh në një kohë kur ushtria amerikane ka përdorur korsinë jugore, pranë brigjeve të Omanit, për të mundësuar hyrjen dhe daljen e cisternave të naftës nga Gjiri.
Zyrtarët amerikanë thonë se gjatë 30 ditëve të fundit më shumë se 500 anije kanë hyrë ose kanë dalë nga ngushtica përmes kanalit jugor, ndërsa vetëm rreth 2 për qind e tyre janë goditur nga dronë ose raketa iraniane.
Tani që minat janë pastruar, anijet do të mund të lëvizin njëkohësisht në të dy drejtimet përmes ngushticës, nën mbrojtjen e Forcave Ajrore amerikane, duke mundësuar eksportimin e sasive më të mëdha të naftës drejt tregjeve globale të energjisë.
Pamja e përgjithshme: Njoftimi i Trumpit erdhi ndërsa ministrat e Jashtëm të Iranit dhe Omanit po takoheshin në Teheran për të negociuar një marrëveshje për lundrimin nëpër ngushticë. Ata nuk arritën marrëveshje.
Në një deklaratë të përbashkët, Irani dhe Omani thanë se po diskutojnë një kornizë për krijimin e një korridori të përkohshëm të përbashkët përmes ngushticës dhe për pastrimin e minave, ndërkohë që zhvillojnë bisedime teknike për një rrugë të përhershme lundrimi dhe për administrimin e ardhshëm të Ngushticës së Hormuzit.
Të dy vendet po diskutojnë gjithashtu një “mekanizëm për shkëmbimin e informacionit, menaxhimin e trafikut dhe ofrimin e shërbimeve përkatëse detare dhe të sigurisë”.
Megjithatë: Mbetet e paqartë nëse një marrëveshje mes Omanit dhe Iranit do të kishte më rëndësi praktike.
Bllokada amerikane po i pengon anijet iraniane të kalojnë nëpër ngushticë. Ndërkohë, njoftimi i Trumpit për heqjen e minave, së bashku me faktin se javët e fundit gjithnjë e më shumë cisterna po lëvizin përmes korsisë jugore të ngushticës, nënkupton se Shtetet e Bashkuara tashmë po arrijnë një pjesë të madhe të objektivave të tyre në Ngushticën e Hormuzit./Axios
