Dubai. Emiratet e Bashkuara Arabe (EBA) synojnë të investojnë edhe 40 miliardë euro të tjera në Gjermani, sipas njoftimit të autoriteteve të vendit. Këtë e bëri të ditur të enjten ministri i Industrisë, Sultan Ahmed al-Jaber. Me këtë, shuma e deritanishme e investimeve të shtetit të Gjirit në ekonominë gjermane, prej rreth 34 miliardë eurosh, do të më shumë se dyfishohet.
Presidenti i EBA-së, Sheik Mohammed bin Zayed Al Nahyan, nisi paraditen e së enjtes një vizitë shtetërore dyditore në Gjermani. Në Berlin ai u prit me nderime ushtarake nga presidenti federal Frank-Walter Steinmeier. Pasdite u takua me kancelarin federal Friedrich Merz (CDU), ndërsa gjatë takimit pritej të nënshkruheshin disa marrëveshje.
Të dyja palët kishin bërë të qartë paraprakisht se synojnë ta shfrytëzojnë vizitën shtetërore për t’i ngritur marrëdhëniet dypalëshe në një nivel më të lartë.
Gjermania prej dekadash është “një partner i rëndësishëm strategjik dhe ekonomik” për Emiratet e Bashkuara Arabe, deklaroi Sultan al-Jaber. Sipas tij, investimet e reja të planifikuara nënvizojnë synimin e Emirateve për ta zgjeruar më tej këtë marrëdhënie.
“Duke u mbështetur në investimet prej 34 miliardë eurosh që Emiratet e Bashkuara Arabe kanë realizuar tashmë në Gjermani, ne do të mbështesim ato degë të industrisë, teknologjitë dhe vendet e punës me kualifikim të lartë që do të nxisin rritjen dhe konkurrueshmërinë në të ardhmen”, tha ai.
Për Gjermaninë, kjo do të thotë investime afatgjata. Do të nxiten kapacitetet industriale, inovacioni dhe punësimi i kualifikuar, do të forcohen siguria energjetike dhe zinxhirët e furnizimit, si dhe do të mbështeten kompanitë gjermane që të mbeten konkurruese në nivel ndërkombëtar dhe të vazhdojnë të rriten, deklaroi ministri i Industrisë.
Al-Jaber është njëkohësisht edhe drejtues i kompanisë shtetërore të naftës së Emirateve, ADNOC.
Për Emiratet e Bashkuara Arabe, zotimet për investime hapin mundësi për investime të përbashkëta me kompani kryesore gjermane të industrisë dhe teknologjisë. Ato synojnë gjithashtu të thellojnë kompetencat e Emirateve në sektorë strategjikë dhe të mundësojnë ngritjen e kompanive që do t’u shërbejnë tregjeve në rritje në rajonin e Gjirit, Azi dhe Afrikë.
Emiratet janë partneri më i rëndësishëm tregtar i Gjermanisë në Gjirin Persik
Emiratet e Bashkuara Arabe janë partneri më i rëndësishëm tregtar i Gjermanisë në rajonin e Gjirit. Vitin e kaluar, tregtia dypalëshe arriti një volum prej mbi 13 miliardë eurosh.
Gjermania eksportoi mallra me vlerë rreth 11 miliardë euro, ndërsa importet nga Emiratet arritën në rreth 2 miliardë euro.
Sipas qeverisë gjermane, investimet gjermane në Emiratet e Bashkuara Arabe drejtohen kryesisht drejt sektorëve me orientim teknologjik dhe mallrave kapitale, përfshirë makineritë dhe produktet kimike.
Tregtia dypalëshe vazhdon të pengohet pjesërisht nga tarifat doganore, si dhe nga kufizimet ndaj importeve dhe eksporteve. Për këtë arsye, qeveria gjermane mbështet negociatat që po zhvillohen ndërmjet Bashkimit Evropian dhe Emirateve të Bashkuara Arabe për një marrëveshje të tregtisë së lirë./Handelsblatt
