Të paktën 81 mjete ajrore të ushtrisë amerikane janë humbur ose dëmtuar që nga fillimi i luftës me Iranin, me humbje që arrijnë deri në 3,3 miliardë dollarë, sipas një raporti të ri të Shërbimit Kërkimor të Kongresit amerikan.
Humbjet përfshijnë disa prej avionëve luftarakë më të avancuar të Amerikës, mes tyre një avion luftarak F-35A Lightning II me teknologji për shmangien e zbulimit nga radarët, i cili është dëmtuar, dhe 12 avionë luftarakë F-15E Strike Eagle, të shkatërruar ose të dëmtuar.
Tre prej avionëve F-15, me vlerë mbi 30 milionë dollarë secili, u rrëzuan nga zjarri i forcave mike mbi Kuvajt më 2 mars, ndërsa një tjetër u rrëzua mbi Iran muajin pasues.
Tetë avionë të tjerë F-15E pësuan dëmtime të lehta gjatë sulmeve ajrore të Iranit ndaj bazës ajrore Muwaffaq Salti, në Jordani, më 9 dhe 10 shtator.
Fatmirësisht, sipas raportit, avionët e dëmtuar janë rikthyer në shërbim.
Një tjetër humbje e konsiderueshme ishte ajo e të paktën 45 dronëve MQ-9 Reaper, vlera e të cilëve përllogaritet nga 30 deri në 50 milionë dollarë për njësi.
Si pasojë e humbjeve, flota e këtyre dronëve shumëfunksionalë — që mund të përdoren për vëzhgim dhe sulme me raketa — u zvogëlua në 135 njësi, i tha Senatit në maj një gjeneral i Forcave Ajrore.
Sipas Air Force Times, Forcat Ajrore duhet të kenë në çdo moment të paktën 189 dronë Reaper të gatshëm për dislokim.
Analiza përfshinte gjithashtu dëmtimin e një avioni të gjeneratës së pestë F-35A, një prej avionëve luftarakë më të avancuar të Amerikës, me vlerë mbi 92 milionë dollarë, i cili u godit nga zjarri iranian më 19 mars.
Shërbimi Kërkimor i Kongresit evidentoi veçanërisht edhe humbjen e një avioni vëzhgimi E-3 Sentry, me vlerë 270 milionë dollarë — një platformë e vjetruar, por thelbësore, e ndërtuar mbi bazën e avionit të pasagjerëve Boeing 707.
Sipas Forcave Ajrore, në vitin 2015 SHBA-ja kishte 32 avionë të tillë në shërbim.
SHBA-ja humbi gjithashtu në prill një avion A-10 Thunderbolt II për sulme ndaj objektivave tokësore, ndërsa një tjetër u dëmtua gjatë sulmit të shtatorit në Jordani.
Lista e plotë e mjeteve ajrore amerikane të humbura ose të dëmtuara në luftën me Iranin
- 12 avionë luftarakë F-15E Strike Eagle;
- një avion luftarak F-35A Lightning II me teknologji për shmangien e zbulimit nga radarët;
- dy avionë sulmues A-10 «Warthog»;
- shtatë avionë KC-135 Stratotanker për furnizim me karburant në ajër;
- një avion zbulimi E-3 Sentry;
- dy avionë MC-130J Commando II për operacione speciale;
- një helikopter HH-60W Jolly Green II për kërkim-shpëtim në kushte luftarake;
- një dron MQ-4C Triton për fluturime në lartësi të mëdha dhe me qëndrueshmëri të gjatë në ajër;
- tre dronë shumëfunksionalë MQ-1;
- një helikopter sulmues AH-64 Apache;
- katër helikopterë të lehtë sulmues AH-6 Little Bird;
- një helikopter detar MH-60 Sea Hawk.
(New York Post)
