Hakerët zbulojnë bilancin e fshehtë të Putinit: Mbi 400 mijë ushtarë rusë të vrarë në luftë

Nga Enrico Franceschini

Shifrat sekrete të Putinit, të vjedhura nga bjellorusët e Cyber Partisans dhe ukrainasit e Silent Crow, të cilët depërtuan në kompjuterët e agjencisë ruse të statistikave Rosstat. Shumica e të rekrutuarve vinin nga zonat aziatike. Analiza e Bloomberg.

LONDËR – Të paktën 400 mijë ushtarë rusë kanë humbur jetën në pothuajse pesë vjet luftë në Ukrainë dhe numri i përgjithshëm i viktimave të pësuara nga trupat e Moskës ka shumë gjasa të jetë edhe më i lartë. Këtë e tregojnë të dhënat e siguruara nga hakerë ukrainas dhe bjellorusë, të cilat më pas iu dorëzuan agjencisë amerikane të lajmeve Bloomberg.

Rusia nuk e bën publik bilancin e humbjeve të pësuara në atë që vazhdon ta quajë një “operacion special ushtarak”, ndërsa Vladimir Putin bën gjithçka për t’ia fshehur vendit të tij koston e vërtetë njerëzore të konfliktit. Zbulimet e reja, në përputhje me analizat e prodhuara më parë nga inteligjenca perëndimore, tregojnë sa i lartë është çmimi që kreu i Kremlinit po u imponon rusëve për të penguar ukrainasit që të zgjedhin lirisht fatin e tyre.

Hakerët kundër Putinit

Të dhënat e publikuara tani janë kapur nga Cyber Partisans, një grup klandestin opozitar bjellorus, dhe nga Silent Crow, një grup hakerësh ukrainas. Së bashku, dy grupet depërtuan në kompjuterët e Rosstat, agjencisë shtetërore ruse që administron të gjitha statistikat kombëtare, duke arritur të analizojnë 11 milionë certifikata vdekjeje për periudhën nga 24 shkurti 2022, kur Rusia pushtoi Ukrainën, deri në fund të gushtit 2026, datë kur janë regjistruar certifikatat e fundit të përfshira në të dhëna.

Çdo certifikatë përmban informacione për emrin, moshën, vendbanimin, vendin dhe shkakun e vdekjes së personit të ndjerë. Gjatë katër vjet e gjysmëve të analizuara, rezultojnë 392.700 vdekje të ndodhura në territoret e konfliktit, për shkaqe të përcaktuara si “operacione ushtarake”, “shpërthime” ose “dronë”.

Numri real i të vdekurve është me siguri edhe më i lartë, komentojnë specialistët e pyetur nga Bloomberg, sepse statistikat nuk përfshijnë personat e zhdukur, trupat e paidentifikuar dhe të plagosurit që kanë humbur jetën më vonë në spitalet ushtarake ose civile në Rusi.

Nga fundi i gushtit, kur përfundon periudha e mbuluar nga të dhënat e hakeruara, kanë kaluar gjithashtu më shumë se dy muaj dhe numri i humbjeve mujore ruse është në dhjetëra mijëra. Sipas inteligjencës amerikane dhe britanike, për shembull, vetëm gjatë muajit tetor forcat ruse humbën 54 mijë njerëz.

Prandaj, ka gjasa që numri i përgjithshëm i ushtarëve rusë të vrarë në Ukrainë të ketë kaluar tashmë gjysmë milioni dhe vazhdon të rritet.

Mosha dhe prejardhja e ushtarëve

Hakerimi i Rosstat zbulon gjithashtu se numri i humbjeve ruse u rrit ndjeshëm pas muajve të parë të luftës, kur trupat ukrainase nisën një kundërofensivë që i detyroi forcat e Moskës të tërhiqeshin nga një pjesë e madhe e rajoneve të pushtuara në fillim të invazionit.

Të dhënat tregojnë gjithashtu se, me kalimin e kohës, Rusia është detyruar të rekrutojë burra të moshave gjithnjë e më të mëdha, dukshëm për shkak të vështirësisë për të mobilizuar një numër të mjaftueshëm ushtarësh. Ato konfirmojnë gjithashtu informacionet e mëparshme, sipas të cilave Putin e ka përqendruar mobilizimin në Rusinë aziatike, duke u përpjekur të kufizojë rekrutimet në pjesën evropiane të vendit, veçanërisht në kryeqytet dhe në Shën Petersburg, për të shmangur rritjen e pakënaqësisë në qendrat kryesore të vendit.

Në gjysmën e parë të vitit 2022, për shembull, vetëm 146 rusë të moshës 50 deri në 59 vjeç humbën jetën në konflikt, më pak se 1 për qind e të gjitha vdekjeve në atë grupmoshë. Ndërsa, gjatë të njëjtëve muaj të vitit 2025, numri i të vdekurve në të njëjtën kategori u rrit në 12.600, ose 16 për qind e totalit.

Në rajonet e largëta të Siberisë, përgjatë kufirit me Mongolinë, rreth një e treta e burrave që vdiqën midis shkurtit 2022 dhe mesit të vitit 2024 humbën jetën në luftën në Ukrainë, ndërsa në Moskë dhe Shën Petersburg, gjatë së njëjtës periudhë, vetëm një në dhjetë vdekje lidhej me luftën.

Rosstat ka pranuar se ka pësuar një sulm kibernetik midis 29 tetorit dhe 1 nëntorit, por mohon që të jenë vjedhur të dhëna konfidenciale.

Pa arritur përparime të rëndësishme në fushën e betejës, këtë vit Rusia ka ndryshuar taktikë, duke u përqendruar më shumë në bombardime të rënda të qyteteve ukrainase dhe të infrastrukturës kyçe, me synimin për të thyer moralin e Kievit.

Në të njëjtën kohë, vëren Bloomberg, Kremlini është përpjekur ta bindë Shtëpinë e Bardhë që ta detyrojë Ukrainën të heqë dorë vullnetarisht nga pjesë të tjera të territorit të saj në kuadër të një marrëveshjeje të mundshme paqeje.

Por hakerimi i të dhënave tregon se çmimi që po paguan Rusia vazhdon të rritet, edhe pse Putin përpiqet ta mbajë të fshehur nga populli i tij. Delegacionet e Moskës, Kievit dhe Uashingtonit pritet të takohen këtë javë në Abu Dhabi për të diskutuar parametrat e një armëpushimi të mundshëm./La Repubblica