Ballina Aktualitet Reportazhe Gërmimet për flori shkatërrojnë fshatin turistik në Librazhd

Gërmimet për flori shkatërrojnë fshatin turistik në Librazhd

Në fshatin Dardhë të Librazhdit, i listuar nga qeveria në 2018-n ndër 100 fshatrat turistikë që do të mbështeten ekonomikisht, prej më shumë se 6 muajsh po gërmohet pa kriter për flori. Gërmimet kryhen natën me ekskavator, në një vend që dikur ka qenë një kishë. Policia dhe bashkia është vënë në dijeni të këtij fakti, por nuk reagojnë.

Në “Fiks Fare” u ankuan banorët e fshatit Dardhë të Librazhdit për gërmimet pa kritere, të cilat sipas tyre po ndikojnë në prishjen e fshatit. Ata pohojnë se nuk e dinë se kush janë individët që po gërmojnë, por vetëm që punojnë natën me ekskavator. Ata ankohen se këto gërmime janë bërë shkak i prishjes së asfaltit dhe poshtë gërmimeve shtrihen shtëpitë e një lagjeje, të cilat janë në rrezik nga shkëputja e mundshme e gurëve.

Njëri prej banorëve tregon se aty dikur ka pas qenë një kishë, madje ai mbante mend edhe rrënojat e saj, por që sot e kësaj dite ato nuk duken më, pasi janë prishur nga gërmimet për flori. Ka edhe nga ata që shprehen se personat që kryejnë gërmimet nuk i lënë fshatarët t’i afrohen vendit në fjalë. Megjithatë, kryeplaku i fshatit shprehet se i janë drejtuar bashkisë me një shkresë, ku kishin parashtruar të gjitha ankesat e tyre. Por deri më sot, ende nuk është bërë gjë. “Policia nuk na mbështet”, pohon njëri prej banorëve.

“Fiks Fare” pa nga afër vendin ku po kryhen gërmimet, sipërfaqja dukej e mbuluar me shpella të vogla, ku në derën e njërës prej tyre gazetarët gjejnë rrobat e punëtorëve që gërmojnë natën.

Për këtë situatë të krijuar, gazetarët iu drejtuan edhe Njësisë Administrative Hotolisht, ku në një bisedë telefonike, kryetari Bexhet Çekrezi, i cili nuk ndodhet në njësi, pohoi se problemin e gërmimeve e kanë deleguar në bashki e polici. “Tani u takon atyre të marrin masa”, shprehet Çekrezi.

Gazetarët iu drejtuan në këtë mënyrë të dyja institucioneve të përmendura, edhe Bashkisë së Librazhdit, edhe policisë. Në bashki, sekretari i Këshillit Bashkiak shprehet se janë në dijeni të çështjes së gërmimeve, ditën që ata janë njoftuar nga njësia dhe kryeplaku, pra në datën 25 shkurt, i kanë kërkuar Komisariatit të Policisë të merret me rastin, por që deri më sot nuk kanë marrë asnjë përgjigje.

Gjithashtu, ai shprehet për “Fiks Fare” se Policia Bashkiake ka shkuar disa herë në vendngjarje, por asnjëherë nuk ka arritur të identifikojë personat që po i kryejnë këto gërmime, pasi ata punojnë natën.

Në polici, gazetarët, në mungesë të shefit të komisariatit dhe shefit të krimeve, kontaktojnë në telefon me inspektorin e zonës. Ai, në një telefonatë të kryer me kryeplakun e fshatit i tregon se po atë ditë një grup nga policia ishin nisur drejt Dardhës. Inspektori nuk e kishte vënë në dijeni kryeplakun, por pasi u vu përballë faktit se gazetarët e “Fiksit” kishin mbërritur në Librazhd, ai e telefonoi.

Gazetarët nisen sërish drejt fshatit. Rrugës, makina e grupit të xhirimeve të “Fiksit” has makinën e policisë. Pyetjeve nëse ishin te gërmimet, policët iu përgjigjën se nuk janë të autorizuar të flasin, madje ata pretendojnë se gazetarët po i pengojnë në operacionin e tyre. Edhe pyetjet se, përse nuk e kanë inspektuar më përpara vendin ku po kryhen gërmimet, apo përse nuk u janë përgjigjur kërkesave nga ana e banorëve të fshatit dhe të bashkisë, mbetën pa përgjigje nga ana e forcave të rendit.

Për sa u përket kërkimeve për flori në këtë zonë, ato datojnë që herët. Si pjesë e rrugës Egnatia, aty kanë kaluar shumë tregtarë, të cilët vinin nga India, Persia, dhe që kishin marrëdhënie tregtare me Perëndimin. Mendohet se ata mbanin me vete shumë flori. Shpesh edhe nga frika se mos ua vidhnin, mendohet se një pjesë të mirë të tyre i kanë fshehur përgjatë kësaj rruge.

@tn.lajmelokale
@tetovanews