Mocioni i anëtarëve të Kuvendit të Aleancës për Shqiptarët në mbështetje të kryetarit Dr Arben Taravari, u konfirumua mbrëmë në takimin e kuvendarëve të partisë në Kumanovë, me një shumicë prej 75 kuvendarëve.
“Kuvendarët e pranishëm njëzëri i dhanë përkrahje Dr Arben Taravarit për formimin e një koalicioni shqiptar fitues, me kushtin që ky koalicion të përbëhet nga parti dhe figura të pakorruptuara, dhe të ketë në kontratën e vet themeluese zotimin për ndryshim dhe për dërgimin e BDI-së në opozitë. Kuvendarët gjithashtu kërkuan që ky koalicion ta përjashtojë bashkëpunimin paszgjedhor me forcat anti-perëndimore që nuk zotohen për ndryshimet kushtetuese që Maqedonia e Veriut duhet t´i bëjë për të vazhduar rrugën evropiane”, thuhet në një njoftim të shpërndarë për media.
Poashtu u mbajt edhe mbledhja e Kryesisë së partisë në të cilën morën pjesë 17 nga gjithse 30 anëtarë sa numëron ky organ. Të gjithë anëtarët e kryesisë, votuan pro qëndrimit të kuvendarëve dhe zgjodhën Bujare Abazin për shefe të shtabit zgjedhor të partisë. Aleanca për Shqiptarët njoftoi se me këtë vendim, pushojnë së funksionuari organet partiake dhe se kompetencat kalojnë në shtabin qendror zgjedhor dhe shtabet komunale të cilat do të formohen në vijim.
