Arabia Saudite ka shpallur nisjen e një “operacioni ushtarak” në Jemen. Koalicioni ushtarak i udhëhequr nga Arabia Saudite u ka bërë thirrje civilëve që të largohen menjëherë nga porti i Mukallës, në provincën Hadramaut, njoftoi të martën agjencia shtetërore saudite e lajmeve SPA. Kjo masë synon mbrojtjen e popullsisë gjatë zhvillimit të operacionit ushtarak.
Koalicioni ushtarak kishte paralajmëruar separatistët në Jemen se do ta mbështeste qeverinë jemene në çdo përballje ushtarake. Forcat e koalicionit do të ndërmarrin “drejtpërdrejt dhe në kohën e duhur (…) të gjitha masat ushtarake” për të “mbrojtur jetën e civilëve”, deklaroi zëdhënësi i koalicionit, gjenerali Turki al-Malki.
Të premten, pozicionet e separatistëve në Jemen u goditën nga sulme ajrore, të cilat iu atribuuan Arabisë Saudite. Pas këtyre sulmeve, qeveria e Jemenit i bëri thirrje koalicionit ushtarak të udhëhequr nga Arabia Saudite që të mbështesë forcat e saj në provincën Hadramaut.
Jemeni i ndarë prej më shumë se një dekade
Lëvizja separatiste Këshilli Tranzitor Jugor (STC), e cila zyrtarisht është pjesë e qeverisë së njohur ndërkombëtarisht të Jemenit, së fundmi ka marrë nën kontroll pjesë të mëdha të rajonit të pasur me naftë të Hadramautit, si dhe zona përreth. Gjatë kësaj, ajo ka zmbrapsur forcat që i përkasin kampit qeveritar jemenas dhe që janë të afërta me grupet islamiste, të cilat në të kaluarën janë mbështetur nga Arabia Saudite.
Të dyja palët – STC dhe grupet islamiste – janë formalisht pjesë e qeverisë së njohur ndërkombëtarisht, por prej vitesh ndodhen në rivalitet me njëra-tjetrën. STC lufton prej dekadash për krijimin e një shteti të pavarur në Jemenin Jugor, siç kishte ekzistuar nga viti 1967 deri në bashkimin e Jemenit në vitin 1990. STC mbështetet politikisht dhe ushtarakisht nga Emiratet e Bashkuara Arabe.
Jemeni është de facto i ndarë prej më shumë se një dekade në një veri të kontrolluar nga milicia pro-iraniane Huthi dhe në një jug të kontrolluar nga një koalicion qeveritar i fragmentuar. Përparimet territoriale të STC-së kanë shtuar frikën për përplasje të reja brenda kampit qeveritar, si dhe për një ndarje të re të mundshme të jugut.
