Në natën e Vitit të Ri, rreth 40 persona humbën jetën në barin “Le Constellation” në Crans-Montana.
Crans-Montana është e tronditur. E mpirë. E pafjalë. Kjo ndihet veçanërisht në Rue Centrale, ku mëngjesin e Vitit të Ri shumë njerëz ndalen pranë shiritit të kuq e të bardhë të policisë. “Vetëm banorët!”, thonë policët që ruajnë zonën përreth barit “Le Constellation”, aty ku vetëm pak orë më parë dhjetëra persona humbën jetën në një zjarr shkatërrues gjatë festimeve të Vitit të Ri.
Zona është e rrethuar dhe e izoluar. Era e djegies ndihet ende, ndërsa njerëzit vendosin lule pranë gardhit. “Është kaq tragjike”, thotë një burrë i moshuar në italisht, banor i Crans-Montana-s. Në gjithë fshatin, njerëzit flasin vetëm për këtë ngjarje, shkëmbejnë lajme mes tyre, pyesin njëri-tjetrin nëse të afërmit janë mirë. Tragjedia ndodhi në zemër të vendit, ndërsa mijëra persona festonin ndërrimin e viteve.
Rreth 40 persona kanë humbur jetën, ndërsa shumë të tjerë luftojnë për jetën
Banorët e Crans-Montana-s pyesin veten: si mund të ndodhte kjo? Edhe autoritetet, në një konferencë të mbajtur me urgjencë, nuk dhanë shumë detaje. Ende nuk ka shifra të sakta për viktimat dhe të plagosurit. Identifikimi i trupave kërkon kohë dhe familjarët duhet të njoftohen më parë. Edhe në konferencën e dytë për shtyp, nuk pati qartësi të plotë. Autoritetet konfirmuan se rreth 40 persona kanë humbur jetën, por shumë prej tyre ende nuk janë identifikuar. Disa të plagosur ndodhen në gjendje kritike në spitale.
Tragjedia është e përmasave të mëdha. Dëshmitarët flasin për skena që i krahasojnë me luftën. Pak minuta pas shpërthimit, tym i zi doli nga lokali, ndërsa njerëzit vraponin të përfshirë nga flakët. Rayan Guiren, 18 vjeç, ishte afër vendit kur ndodhi gjithçka. “Kur mbërritëm, njerëzit ishin shtrirë përtokë, të djegur, disa pa ndjenja,” thotë ai. “Prindërit përpiqeshin me dëshpërim të hynin brenda për të gjetur fëmijët e tyre.”
Sipas tij, shumë nga të pranishmit ishin të rinj, mes 15 dhe 20 vjeç. Sipas transmetuesit zviceran RTS, viktima më e re ishte vetëm 16 vjeç. Policia nuk lejoi askënd të kthehej brenda lokalit. Dy miq të Rayanit ndodhen aktualisht në spital. Rreth 115 të plagosur u dërguan në spitale në rajon, si dhe në Lozanë e Cyrih. U angazhuan rreth 40 autoambulanca dhe 13 helikopterë.
“Era e djegies ishte kudo”
Një grua që kaloi natën në spitalin e Sionit me nënën e saj i tha gazetës Le Nouvelliste se, kur mbërritën të plagosurit e parë, stafi mjekësor u kërkoi njerëzve të largoheshin nga hyrja. “Dola jashtë për të liruar rrugën dhe atëherë shpërtheu kaosi. Njerëz të plagosur vinin nga të gjitha anët, makina të ndaluara kudo. Era e djegies ishte gjithandej.”
Sipas transmetuesit publik SRF, lokali “Le Constellation” ishte veçanërisht i frekuentuar nga të rinjtë e moshës 16 deri në 25 vjeç dhe konsiderohej një nga vendet më të njohura për turistët.
“Vendi ku duhej të festohej jeta”
“Le Constellation” ishte një pikë e njohur e jetës së natës, sidomos për turistët nga bota. Ai drejtohej nga një çift francez nga Korsika dhe kishte kapacitet rreth 300 persona. Sa njerëz ndodheshin aty natën e tragjedisë ende nuk dihet. Banorët flasin për qindra të pranishëm, ndërsa pyetjet për sigurinë po shtohen.
“Kishte vetëm një dalje,” thotë një banor që e njihte mirë lokalin. “Nuk kishte dalje emergjente.” Kjo ende nuk është konfirmuar zyrtarisht, por do të jetë pjesë e hetimeve. Prokurorja e përgjithshme Béatrice Pilloud deklaroi se do të hetohet nëse janë respektuar rregullat e sigurisë.
Ndërkohë, autoritetet po përpiqen të zbardhin shkakun e zjarrit. Janë përmendur fishekzjarrë ose mjete piroteknike, por ende nuk ka një përfundim zyrtar. “I gjithë ambienti u përfshi nga flakët,” deklaroi prokurorja.
Ndërsa hetimet vazhdojnë, në Crans-Montana ndihet një solidaritet i fortë. Shumë lokale kanë qëndruar të mbyllura. Të tjera janë bërë vende ku njerëzit mblidhen për t’u mbështetur mes vete.
“Si je?” – pyesin njëri-tjetrin banorët. Përqafohen, qajnë, heshtin. Jeta vazhdon, por hija e tragjedisë rëndon mbi gjithë qytetin./TetovaNews
Deadly blaze: About 40 people were killed and around 115 others injured in a fire at a New Year’s party in a Swiss ski resort bar, according to police. Authorities said many of the victims were young, and it will take days to identify all of them.#cransmontana #fire #brand… pic.twitter.com/TSbuTUelk9
— Tetova News (@TetovaNews1) January 1, 2026
