Rusia i ka kërkuar zyrtarisht Shteteve të Bashkuara që të ndalojnë ndjekjen e një cisterne nafte që ishte në rrugë drejt Venezuelës. Këtë e raportojnë burime për The New York Times.
SHBA-ja ka rreth dy javë që po ndjek cisternën Bella I. Ajo ishte shënjestër e një përpjekjeje të dështuar amerikane për ta ndaluar në Detin Karaibe pak para Krishtlindjeve. Autoritetet amerikane kishin kërkuar leje për të hipur në bord, por ekuipazhi e kishte refuzuar kërkesën. Ndërhyrja me forcë nuk u bë, thuhet, për shkak të mungesës së personelit të mjaftueshëm.
Pas kësaj, anija ndryshoi drejtim dhe u nis drejt detit të hapur. Bella I ndodhet në listën amerikane të sanksioneve që nga qershori i vitit 2024, pasi kishte transportuar naftë për një kompani të lidhur me Hezbollah-un. Kjo organizatë libaneze është e shpallur terroriste nga SHBA.
Flamuri rus në bord
Anija tani po përpiqet t’i shpëtojë ndjekjes së rojës bregdetare amerikane në Oqeanin Atlantik. Kërkesa e Rusisë për të ndalur ndjekjen u dërgua gjatë natës, sipas burimeve, në Departamentin e Shtetit dhe në zyrën e këshilltarit kryesor të presidentit Trump, Stephen Miller.
Ditët e fundit, ekuipazhi ka pikturuar një flamur rus në anën e anijes, me shpresën se do të përfitonte mbrojtje nga Rusia. Ata gjithashtu kanë kontaktuar rojën bregdetare amerikane duke deklaruar se po lundronin nën flamurin rus. Më parë, anija kishte flamur panamez. Sipas së drejtës ndërkombëtare, anijet mbrohen nga shteti nën flamurin e të cilit lundrojnë.
Për më tepër, Bella I është regjistruar së fundmi në regjistrin zyrtar rus të anijeve, me emrin e ri Marinera, dhe me port regjistrimi në Soçi, në Detin e Zi.
Flota në hije ruse
Bella I është pjesë e të ashtuquajturës “flotë hije” – një rrjet prej rreth 1500 cisternash që përdoren nga Rusia, Irani dhe Venezuela për të transportuar naftë në mënyrë të fshehtë, duke anashkaluar sanksionet perëndimore.
Këto anije shpesh lundrojnë me dokumente të rreme dhe përpiqen të fshehin pozicionin e tyre. Që nga fillimi i luftës në Ukrainë, kjo flotë ka qenë thelbësore për Rusinë për të vazhduar eksportin e naftës.
Shtëpia e Bardhë ende nuk ka reaguar zyrtarisht ndaj kërkesës ruse. Një zyrtar anonim i tha New York Times se administrata Trump vazhdon ta konsiderojë anijen si “pa shtetësi”, pasi ajo po lundronte nën flamur të rremë në momentin kur u ndalua për herë të parë nga roja bregdetare.
Muajin e kaluar, presidenti Trump vendosi një bllokadë ndaj anijeve që transportojnë naftë nga Venezuela, me qëllim ushtrimin e presionit ndaj regjimit të presidentit Nicolás Maduro. Deri tani, SHBA ka konfiskuar dy cisterna në Detin e Karaibeve dhe ka paralajmëruar se do të ndërmarrë veprime të tjera të ngjashme./TetovaNews
