Nga nesër nis zyrtarisht zbatimi i sistemit “Safe City”, me ç’rast regjistrimi dhe sanksionimi automatik i shkeljeve të trafikut hyn në funksion të plotë. Bëhet fjalë për një sistem të integruar teknik-informativ që, përmes kamerave dhe mjeteve softuerike, do t’i evidentojë shkeljet në trafik pa nevojën e pranisë së drejtpërdrejtë të policisë në terren.
Në fazën e parë, “Safe City” do të sanksionojë katër lloje shkeljesh:
tejkalim i shpejtësisë së lejuar,
kalim në dritë të kuqe,
drejtim mjeti me regjistrim të skaduar,
ndalim ose parkim i parregullt.
Kamerat e vendosura në akse kryesore dhe kryqëzime do ta regjistrojnë automatikisht shkeljen, do ta identifikojnë targën dhe do ta përpunojnë pamjen përmes një sistemi qendror verifikimi.
Pasi shkelja të konstatohet, pronari i mjetit do të marrë njoftim me provë fotografike, kohë dhe vendndodhje, si dhe sanksionin përkatës. Procedura është plotësisht e digjitalizuar, me faktor njerëzor minimal, për të shmangur selektivitetin, subjektivitetin dhe abuzimet e mundshme.
Gjobat për tejkalim shpejtësie
deri në 20 km/h mbi limit: 20 € (kundërvlerë në denarë)
20–30 km/h: 45 €
30–50 km/h: 300 € dhe ndalim drejtimi 3–12 muaj
mbi 50 km/h: 400 €, 4 pikë ndëshkuese dhe ndalim drejtimi minimum 12 muaj
Në zona të banuara, gjobat janë më të rrepta dhe mund të arrijnë deri 500 €, me ndalim të detyrueshëm drejtimi.
Kalimi në dritë të kuqe
250 € gjobë
ndalim drejtimi 3–12 muaj
Nëse shkelja shkakton rrezik ose aksident, zbatohet edhe përgjegjësi penale.
Drejtim me dokumente të skaduara
100 € për shoferin
250 € për pronarin (nëse është person tjetër)
Verifikimi bëhet automatikisht përmes regjistrave të MPB-së.
Parkim/ndalim i parregullt
30 € për shkelje standarde
45 € nëse pengohet trafiku
50 € nëse zë vend për persona me aftësi të kufizuara
Në raste rreziku: heqje me shërbimin “karrotreci” dhe kosto shtesë
Nëse gjoba paguhet brenda 8 ditësh, paguhet 50% e shumës. Pas afatit, gjoba arkëtohet e plotë, me mundësi inkasimi të detyruar.
Institucionet theksojnë se qëllimi i “Safe City” nuk është represioni, por parandalimi dhe rritja e sigurisë rrugore. Pritet ulje e aksidenteve, sidomos atyre me pasoja të rënda, si dhe disiplinë më e lartë në trafik.
Me nisjen e sistemit, “Safe City” shënon një epokë të re në kontrollin e trafikut: kamerat mbajnë mend gjithçka, dhe shkeljet nuk varen më nga prania e patrullave, por nga respektimi i rregullave nga drejtuesit.
