Ministri i Brendshëm, Ali Yerlikaya, deklaroi se lufta kundër drogës po vazhdon në mënyrë gjithëpërfshirëse, duke njoftuar se në kuadër të operacioneve “Narkokapan”, të zhvilluara në 14 provinca me qendër Izmirin, janë ndaluar 641 persona.
Ministri i Brendshëm Ali Yerlikaya bëri vlerësime lidhur me zhvillimet aktuale.
Duke theksuar se lufta kundër drogës po zhvillohet në mënyrë shumë të gjerë dhe gjithëpërfshirëse, Yerlikaya njoftoi se gjatë vitit 2025, në operacionet antidrogë janë arrestuar 43.524 të dyshuar.
Yerlikaya foli gjithashtu edhe për zhvillimet në Siri.
Deklaratat e ministrit Yerlikaya janë si më poshtë:
“Lufta jonë kundër drogës vazhdon me vendosmëri, në mënyrë shumë-shtresore dhe shumë-dimensionale. Ne organizojmë operacione të veçanta për të thyer një nga një çdo hallkë të zinxhirit të furnizimit – nga kreu i organizatave kriminale të drogës, te drejtuesit dhe deri te shitësit në rrugë. Nuk mjaftohemi vetëm me kapjen e lëndëve narkotike; ne shkatërrojmë rrjetet e furnizimit të këtyre veprimtarive të krimit të organizuar dhe godasim të ardhurat kriminale.”
Operacioni “Narkokapan Izmir”
“Në 14 provinca, me qendër Izmirin, kemi zhvilluar operacione të njëkohshme në 608 adresa të ndryshme, duke ndaluar 641 persona. Shkalla e arrestimit të shitësve të drogës të kapur në kuadër të operacioneve ‘Narkokapan’ është 95 për qind.
Operacionet e zhvilluara në këtë shkallë dhe me këtë nivel koordinimi tregojnë qartë aftësinë e lartë të policisë sonë për bashkërendim, shpejtësinë operacionale në terren dhe vendosmërinë e saj. Për qetësinë e kombit tonë të shenjtë, ne do ta vazhdojmë këtë luftë që shkon në rrënjë të krimit me të njëjtën disiplinë dhe të njëjtën vendosmëri. Lufta kundër drogës nuk është vetëm një ‘çështje e sigurisë së brendshme’; kjo është një ‘luftë e sigurisë globale’.
Ne i kemi shpallur luftë të gjithanshme drogës! Dhe këtë luftë nuk e zhvillojmë vetëm në emër të vendit tonë, por në emër të gjithë njerëzimit.”
Operacionet antidrogë të vitit të kaluar
“Në vitin 2025, në kuadër të operacioneve kundër trafikantëve të drogës, 43.524 persona u arrestuan. Gjatë këtij mandati të kabinetit tonë, numri total i të arrestuarve ka arritur në 100.509.
Po gjatë këtij mandati, janë sekuestruar 233 ton lëndë narkotike dhe 278 milionë tableta droge.
Në të njëjtën periudhë, kemi shkatërruar 357 organizata kriminale të drogës, prej të cilave 46 kishin karakter ndërkombëtar. Kemi kapur në vendin tonë 136 të dyshuar të huaj, krerë dhe drejtues të organizatave kriminale të drogës, të kërkuar me Njoftim të Kuq. Gjithashtu, kemi siguruar ekstradimin në vendin tonë të 120 të dyshuarve të tjerë të kërkuar me Njoftim të Kuq.”
“Me karakter historik”
“Shifrat që kam shpallur janë të një rëndësie historike.
Ne po luftojmë në të gjitha frontet e zinxhirit të drogës. Kemi ekipe shumë të suksesshme, të përkushtuara ndaj kësaj kauze, që punojnë ditë e natë. Në koordinim të plotë me të gjitha institucionet përkatëse të vendit tonë, ne po e vazhdojmë luftën kundër drogës në mënyrë të gjithanshme.
Po ashtu, po realizojmë dhe do të vazhdojmë të realizojmë operacione të përbashkëta antidrogë me vendet evropiane dhe shtete të tjera.
Sot, Turqia nuk është më një vend që vetëm ndjek në luftën kundër krimit; ajo është një vend që drejton, koordinojnë, ndan dhe merr informacion inteligjence, dhe udhëheq bashkëpunimin operacional.”
Zhvillimet në Siri
“Ne po i ndjekim nga afër, moment pas momenti dhe me përpikëri, zhvillimet e fundit në Siri dhe çdo lëvizje përgjatë vijës sonë kufitare, në bashkëpunim me të gjitha institucionet përkatëse të shtetit tonë. Dua të theksoj edhe një herë se nuk do të tolerojmë asnjë iniciativë, asnjë provokim dhe asnjë operacion manipulimi që synon të prishë qetësinë e vendit tonë.
Veçanërisht lajmet e rreme që përhapen qëllimisht në rrjetet sociale dhe postimet që synojnë të shkaktojnë panik në shoqëri përbëjnë një aktivitet të hapur dezinformimi. Kundër atyre që publikojnë përmbajtje të tilla provokuese, Drejtoria për Luftën Kundër Krimeve Kibernetike dhe Drejtoria e Sigurisë po i vazhdojnë pa ndërprerje veprimet e tyre.”
