Në mes të tensioneve në rritje, udhëheqja e Iran-it duket se po ndërmerr masa drastike: mijëra persona dyshohet se janë arrestuar ditët e fundit për të shuar në embrion një ringjallje të protestave mbarëkombëtare. Aktivistë dhe përfaqësues të qeverisë flasin për një klimë frike dhe për arrestime pothuajse të rastësishme.
Sipas pesë aktivistëve dhe dy zyrtarëve iranianë që folën për agjencinë e lajmeve Reuters, forcat e sigurisë të veshura civilë kanë arrestuar mijëra persona të dyshuar si kundërshtarë të regjimit. Të ndaluarit thuhet se janë dërguar në vende sekrete. Qëllimi i këtij operacioni, sipas burimeve, është frikësimi i popullsisë. “I arrestojnë të gjithë,” tha një aktivist për Reuters.
Autoritetet veprojnë veçanërisht ashpër
Se ku po dërgohen të arrestuarit mbetet e paqartë. Sipas Reuters, edhe avokatë dhe mjekë raportojnë për një ashpërsi të jashtëzakonshme të autoriteteve. Reprezaljet, sipas tyre, nuk ndalen as ndaj familjarëve të protestuesve, as ndaj personelit mjekësor.
Organizata për të drejtat e njeriut me seli në SHBA, HRANA, vlerëson se numri i arrestimeve gjatë trazirave ka arritur në 42.486 persona. Po ashtu, 6.373 njerëz kanë humbur jetën, përfshirë gati 6.000 protestues. Autoritetet iraniane i kanë kundërshtuar këto shifra dhe, së fundmi më 21 janar, kanë raportuar për 3.117 të vdekur. Sipas tyre, përgjegjës për dhunën janë “terroristë të armatosur”.
“Arrestime arbitrare”
Zyra e OKB-së për të drejtat e njeriut ka paralajmëruar për rrezik torture dhe procese gjyqësore të padrejta. Ndërkohë, Amnesty International ka raportuar për “arrestime arbitrare në shkallë të gjerë” dhe për zhdukje të personave, në lidhje me masat e fundit të forcave të sigurisë iraniane./tn
