Një stuhi e fuqishme dimërore ka goditur Shtetet e Bashkuara, duke lënë rreth 217,000 konsumatorë pa energji elektrike dhe duke shkaktuar anulimin e mbi 4,000 fluturimeve në mbarë vendin.
Stuhia, e shoqëruar me borë të dendur, shi dhe temperatura ekstremisht të ulëta, pritet të përfshijë dy të tretat lindore të vendit dhe të zgjasë edhe gjatë ditëve në vijim. Zonat më të prekura janë Luiziana, Misisipi, Teksasi dhe Tenesi.
Presidenti Donald Trump e cilësoi situatën si “historike” dhe miratoi shpalljen e gjendjes së emergjencës federale në 12 shtete, ndërsa 17 shtete dhe Distrikti i Kolumbias kanë shpallur emergjencë për shkak të motit ekstrem.
Ndërsa në Nju Jork, ku temperaturat pritet të mbeten nën zero gjatë gjithë ditës dhe në Central Park pritet të bjerë 30 cm borë, kryebashkiaku Zohran Mamdani u bëri thirrje banorëve të shmangin udhëtimet jo të domosdoshme sot. Një vendim do të merret më vonë gjatë ditës nëse shkollat do të mbyllen nesër, në të cilin rast mësimi do të mbahet online.
Shërbimi Kombëtar i Motit paralajmëroi për pasoja shkatërruese deri në nivele katastrofike, veçanërisht në juglindje të vendit, për shkak të akullit të dendur dhe të ftohtit rekord. Autoritetet u bëjnë thirrje qytetarëve të shmangin udhëtimet dhe të marrin masa mbrojtëse.
Kjo stuhi dimërore, e përshkruar si “jashtëzakonisht e gjerë dhe e zgjatur” nga NWS, u shkaktua nga masa ajri shumë të ftohta që vinin nga Kanadaja.
