Astronomët kanë identifikuar një strukturë misterioze në hapësirë që mund të tregojë se çfarë e pret Tokën pas miliarda vitesh, kur Dielli të arrijë fundin e jetës së tij.
Një ekip shkencëtarësh ka zbuluar një “shufër hekuri” të pazakontë në qendër të Mjegullnaja e Unazës, e cila ndodhet rreth 2.283 vite-dritë larg Tokës. Sipas studiuesve, kjo strukturë e rrallë mund të jetë mbetje e një planeti shkëmbor, të ngjashëm me Tokën, i cili është shkatërruar nga ylli i tij në fazën përfundimtare të evolucionit.
Siç raporton Mirror, bëhet fjalë për një brez atomesh hekuri të jonizuara – një formë që nuk ishte vërejtur më parë në këtë mjegullnajë. Shkencëtarët besojnë se kjo mund të përfaqësojë një “pamje nga e ardhmja”, duke treguar se si mund të duket Toka pasi të shkatërrohet nga Dielli.
Dy skenarë të mundshëm
Studiuesit paraqesin dy shpjegime kryesore për formimin e kësaj strukture:
ajo mund të jetë krijuar nga një proces ende i panjohur gjatë hedhjes së shtresave të yllit amë;
ose mund të jetë një hark plazme i formuar nga avullimi i një planeti shkëmbor, i cili ka hyrë në zonën e zgjerimit të hershëm të yllit.
Autori i studimit, astronomi Roger Wesson, ka deklaruar se sasia e hekurit të zbuluar përputhet me atë që pritej nga avullimi i një planeti: nëse do të ishte Merkuri ose Marsi, sasia do të ishte më e vogël; nëse do të ishte Toka ose Venusi, pak më e madhe.
Çfarë e pret Tokën?
Sipas shkencëtarëve, kur yje si Dielli shterojnë karburantin bërthamor, ato zgjerohen duke u shndërruar në gjigantë të kuq. Në këtë fazë, shtresat e jashtme hidhen në hapësirë, ndërsa bërthama shndërrohet në një xhuxh të bardhë, duke krijuar një mjegullnajë planetare.
Ky proces pritet t’i ndodhë Diellit pas rreth pesë miliardë vitesh. Atëherë, Toka me shumë gjasë do të avullohet nga nxehtësia ekstreme ose do të copëtohet nga forca të fuqishme gravitacionale.
Shkencëtarët theksojnë se struktura e zbuluar në Mjegullnajën e Unazës mund të jetë një nga shembujt më konkretë deri më sot për të kuptuar se si do të dukej fundi i planetit tonë në sytë e astronomëve të së ardhmes.
