Një ngjarje e rëndë ka tronditur familjen Hamiti, fshatin Gradec të Gostivarit dhe komunitetin shqiptar në Itali. Fidan Hamiti, 44 vjeç, me origjinë nga Gradeci i Gostivarit dhe banues në Bazzano të Italisë, ka humbur jetën si pasojë e një aksidenti tragjik me motoçikletë në Valsamoggia, në provincën e Bolonjës.
Sipas mediave italiane, aksidenti ka ndodhur të martën, më 2 qershor 2026, rreth orës 10:00 të mëngjesit, në rrugën Palazzetto, përgjatë rrugës provinciale SP76, në lokalitetin Stiore të Valsamoggias.
Hamiti ndodhej duke drejtuar motoçikletën e tij “Yamaha TMax”, një skuter me kubikazh të madh, kur pranë një kthese, për shkaqe që ende nuk janë sqaruar plotësisht, ka humbur kontrollin e mjetit. Pas humbjes së kontrollit, ai ka dalë nga rruga, është përplasur dhe ka përfunduar në një kanal anës rrugës.
Përplasja ka qenë jashtëzakonisht e rëndë. Menjëherë pas aksidentit është dhënë alarmi dhe në vendngjarje kanë mbërritur ekipet e emergjencës italiane 118, me ambulancë, automjekësi dhe helikopter shpëtimi. Në vendin e ngjarjes kanë dalë edhe karabinierët e kompanisë së Casalecchio di Reno-s, të cilët kanë kryer hetimet dhe matjet e para.
Pavarësisht ndërhyrjes së shpejtë të ekipeve mjekësore, për 44-vjeçarin nuk ka pasur mundësi shpëtimi. Plagët e marra nga përplasja kanë qenë fatale dhe ekipet e urgjencës kanë mundur vetëm të konstatojnë vdekjen e tij. Sipas mediave italiane, Hamiti ka ndërruar jetë në vendin e aksidentit.
Rrethanat e plota të ngjarjes janë ende duke u hetuar. Karabinierët po punojnë për të rindërtuar dinamikën e saktë të aksidentit, por sipas të dhënave të para, dyshohet se aksidenti ka ndodhur në mënyrë autonome, pa përfshirjen e mjeteve apo personave të tjerë.
Lajmi për vdekjen e Fidan Hamitit është bërë i ditur edhe nga faqja e fshatit Gradec, ndërsa më pas është shpërndarë nga familjarë, miq, bashkëfshatarë dhe media të ndryshme shqiptare. Vdekja e tij ka shkaktuar dhimbje të madhe te të afërmit dhe te komuniteti nga i cili vinte.
Në mesazhet e ngushëllimit, familjarët, miqtë dhe bashkëfshatarët kanë shprehur pikëllimin e tyre për humbjen e parakohshme të 44-vjeçarit, duke lutur Zotin që ta mëshirojë dhe familjes t’i japë forcë e durim për ta përballuar këtë humbje të rëndë.
“Inna lillahi ue inna ilejhi raxhiun. Allahu e mëshiroftë Fidan Hamitin dhe e shpërbleftë me Xhenetin Firdeus”, thuhet në një nga mesazhet e ngushëllimit të publikuara pas lajmit të hidhur.
Mediat italiane e kanë përshkruar aksidentin si një tjetër tragjedi në rrugët e provincës së Bolonjës, duke theksuar se vetëm ditët e fundit në atë zonë janë regjistruar edhe aksidente të tjera fatale me motoçikleta.
Fidan Hamiti ishte 44 vjeç, me origjinë nga fshati Gradec i Gostivarit dhe banonte në Bazzano të Italisë. Ai humbi jetën mëngjesin e 2 qershorit në lokalitetin Stiore të Valsamoggias, pasi motoçikleta që drejtonte doli nga rruga dhe përfundoi në kanal.
Familjes Hamiti, të afërmve, miqve dhe bashkëfshatarëve u shprehim ngushëllimet më të sinqerta. Allahu e mëshiroftë!/TetovaNews
