Pas tentativës për grusht shteti të 15 korrikut 2016, të organizuar sipas autoriteteve turke nga Organizata Fetullahiste (FETÖ), Drejtoria e Policisë së Stambollit zhvilloi 9 mijë e 626 operacione gjatë dhjetë vjetëve të fundit. Në këto operacione u kapën 34 mijë e 116 të dyshuar, prej të cilëve 13 mijë e 272 u lanë në paraburgim.
Kanë kaluar dhjetë vjet nga tentativa për grusht shteti e kryer më 15 korrik 2016 nga Organizata Terroriste Fetullahiste, e njohur me shkurtesën FETÖ.
Ekipet e Drejtorisë së Policisë së Stambollit, veçanërisht njësitë kundër terrorizmit dhe të inteligjencës, si dhe njësitë kundër kontrabandës dhe krimeve financiare, së bashku me ekipet e drejtorive policore të 39 distrikteve të qytetit, kanë vazhduar punën e tyre gjatë dhjetë vjetëve të fundit.
Sipas të dhënave të Drejtorisë së Policisë së Stambollit, gjatë tentativës për grusht shteti, të ndërmarrë mbrëmjen e 15 korrikut 2016 nga ushtarë të lidhur me FETÖ-n, të infiltruar në Forcat e Armatosura Turke, në të gjithë vendin humbën jetën 63 policë, gjashtë ushtarë dhe 184 civilë.
Strukturat ushtarake, shtetërore dhe aktuale të FETÖ-s
Forcat e rendit, duke vepruar në bashkërendim të ngushtë me prokuroritë publike në Stamboll dhe Organizatën Kombëtare të Inteligjencës së Turqisë, zhvilluan hetime dhe operacione kundër strukturave ushtarake, shtetërore dhe rrjeteve aktive të FETÖ-s.
Policia realizoi mijëra operacione kundër personave të dyshuar se kishin marrë pjesë ose kishin planifikuar tentativën për grusht shteti, kundër atyre që fshihnin identitetin dhe veprimtarinë e tyre, si dhe kundër personave që qëndronin në banesa të fshehta, të njohura si “shtëpi gaybubet”, duke pritur udhëzime ose duke u përgatitur për riorganizimin e strukturës.
9 mijë e 626 operacione
Që nga momentet e para të tentativës për grusht shteti, ekipet e Drejtorisë së Policisë së Stambollit punuan ditë e natë për identifikimin dhe dërgimin para drejtësisë të personave të përfshirë.
Gjatë dhjetë vjetëve u zhvilluan gjithsej 9 mijë e 626 operacione për kapjen e të dyshuarve, mes të cilëve kishte persona që dyshohej se kishin luajtur rol aktiv në terren ose kishin dhënë urdhra.
Policia e Stambollit kapi 34 mijë e 116 të dyshuar, përfshirë oficerë të rangjeve të ndryshme, punonjës të administratës publike, mjekë, gjyqtarë dhe prokurorë.
Pas përfundimit të procedurave policore, të dyshuarit u dërguan në prokuroritë dhe gjykatat ku zhvilloheshin hetimet përkatëse.
13 mijë e 272 të paraburgosur
Nga personat e kapur gjatë dhjetë vjetëve të fundit dhe të dërguar para gjykatës, 13 mijë e 272 u lanë në paraburgim.
Ndaj 8 mijë e 536 personave u vendosën masa të kontrollit gjyqësor, ndërsa 12 mijë e 308 të tjerë u liruan pas përfundimit të procedurave./TetovaNews
