Departamenti amerikan i Drejtësisë dhe TikTok, së bashku me kompaninë mëmë ByteDance, kanë arritur një marrëveshje prej 400 milionë dollarësh për të zgjidhur akuzat se kanë shkelur ligjet për privatësinë e fëmijëve në internet, sipas një njoftimi që iu dha fillimisht Axios-it.
Pse ka rëndësi: Departamenti i Drejtësisë i administratës Biden e ngriti fillimisht padinë në vitin 2024. TikTok do t’i mbyllë akuzat se ka shkelur ligjin amerikan për mbrojtjen e privatësisë së fëmijëve në internet duke paguar gjithsej 400 milionë dollarë, pa iu nënshtruar një procesi të mëtejshëm gjyqësor dhe pa pranuar se ka kryer shkelje.
Që nga ngritja e padisë, “TikTok ka pësuar ndryshime të rëndësishme në pronësi, menaxhim, funksionet e pajtueshmërisë me rregullat dhe praktikat e privatësisë”, thuhet në njoftimin e Departamentit të Drejtësisë.
Marrëveshja është një nga kompensimet më të mëdha të siguruara ndonjëherë në një çështje të ngritur në bazë të ligjit për privatësinë, sipas Departamentit të Drejtësisë.
Çfarë po thonë: “Kjo marrëveshje është një fitore e madhe për fëmijët dhe prindërit amerikanë”, deklaroi zëvendësprokurori i përgjithshëm Stanley Woodward.
“Prioriteti i Departamentit është të sigurojë që fëmijët të mbrohen në internet dhe që kompanitë të cilave u besohet informacioni i tyre personal të përmbushin detyrimet ligjore. Kjo zgjidhje siguron një kompensim të konsiderueshëm, ndërsa përforcon mbrojtjen që familjet presin dhe meritojnë.”
Departamenti i Drejtësisë pohon se ndryshimet që TikTok ka bërë që prej vitit 2024 kanë “çuar përpara në mënyrë të konsiderueshme interesat publike” që qëndronin në themel të padisë fillestare dhe kanë “forcuar mbrojtjen për miliona familje amerikane”.
Ndryshimet e bëra gjatë negociatave për marrëveshjen përfshijnë masa më të forta mbrojtëse për të miturit, kontrolle më të mira të lidhura me moshën dhe mekanizma që u mundësojnë prindërve të kenë mbikëqyrje më të madhe, sipas Departamentit të Drejtësisë.
Kthim pas: Kur Departamenti i Drejtësisë ngriti padinë në vitin 2024, nën drejtimin e atëhershëm të prokurorit të përgjithshëm Merrick Garland dhe së bashku me Komisionin Federal të Tregtisë, qeveria e akuzoi TikTok-un se kishte shkelur në disa mënyra një urdhër të mëparshëm të miratuar me pëlqim në vitin 2019.
Ndër akuzat ishte se TikTok:
- “Me vetëdije u lejonte fëmijëve të krijonin llogari të zakonshme në TikTok dhe të krijonin, shikonin e shpërndanin video të shkurtra dhe mesazhe me të rritur dhe persona të tjerë në platformën e zakonshme TikTok.”
- Mblidhte dhe ruante në mënyrë të paligjshme adresat e postës elektronike dhe të dhëna të tjera personale të fëmijëve.
Pamja e përgjithshme: TikTok është shpëtuar disa herë nga administrata Trump, pasi u miratua një ligj që kërkonte shitjen e aktivitetit amerikan të aplikacionit ose ndalimin e tij dhe që më pas u la në fuqi nga Gjykata e Lartë.
Pas disa shtyrjeve të zbatimit të ligjit, krijimi i një sipërmarrjeje të përbashkët në Shtetet e Bashkuara i mundësoi aplikacionit të vazhdonte të funksiononte në tregun amerikan pa u ndaluar.
Përfundimi: Ky është suksesi i dytë i madh për TikTok-un gjatë mandatit të dytë të Donald Trump. Marrëveshja prej 400 milionë dollarësh është e kushtueshme për kompaninë, por gjithsesi përbën një rezultat më të favorshëm sesa vazhdimi i një beteje të gjatë gjyqësore me Departamentin e Drejtësisë./Axios
