Në zonat turistike dhe mjetet e transportit publik në Stamboll është zhvilluar një operacion kundër grupeve kriminale që merreshin me vjedhje xhepash. Në pranga kanë përfunduar 32 të dyshuar, mes tyre edhe tre persona të dyshuar si drejtues të grupeve.
Operacioni u zhvillua në kuadër të një hetimi të nisur nga Prokuroria e Përgjithshme e Stambollit ndaj grupeve kriminale të dyshuara për vjedhje të organizuara të xhepave.
Si rezultat i operacionit, policia ndaloi 32 persona, tre prej të cilëve dyshohet se ishin drejtues të rrjeteve kriminale.
Përmes ndjekjes teknike dhe fizike, policia arriti të dokumentonte një sërë veprimtarish të organizuara të këtyre grupeve.
Sipas hetimit, të dyshuarit vepronin në disa prej zonave më të frekuentuara të Stambollit, përfshirë Sheshin Taksim, stacionin e tramvajit në Karaköy, zonën Dolmabahçe–Kabataş, stacionin e autobusëve detarë në Kabataş, stacionet e tramvajit në Sirkeci dhe Eminönü, si dhe në kalime të tjera me fluks të madh këmbësorësh.
Hetuesit kanë konstatuar se të dyshuarit vepronin në grupe prej tre deri në gjashtë personash dhe kishin në shënjestër kryesisht turistët e huaj.
Ata dyshohet se rrethonin viktimën dhe përdornin metoda të njohura si “ngjeshja” dhe “mbulimi”, duke krijuar turmë ose duke penguar fushën e shikimit të viktimës, ndërsa një prej anëtarëve të grupit kryente vjedhjen.
Momentet e vjedhjeve janë regjistruar nga kamerat e sigurisë dhe pamjet janë përfshirë si prova në dosjen e hetimit.
Sipas autoriteteve, grupet kryenin mesatarisht rreth 10 vjedhje në ditë dhe kishin siguruar të ardhura nga aktiviteti kriminal në një vlerë prej më shumë se 400 mijë lirash turke.
Ministri turk i Drejtësisë, Akın Gürlek, duke dhënë detaje për operacionin në rrjetet sociale, deklaroi:
“Ne nuk do t’i lejojmë rrugë të lirë asnjë organizate kriminale që cenon qetësinë e qyteteve tona.”
Shënim: lidhja e artikullit të NTV-së ende përmban formulimin “20 të dyshuar”, ndërsa titulli dhe përmbajtja e përditësuar e artikullit raportojnë 32 të dyshuar të ndaluar./NTV
