Shira të dendura goditën të enjten pjesë të Japonisë qendrore, duke shkaktuar rrëshqitje dheu dhe përmbytje. Autoritetet morën një sërë raportimesh për automjete të përmbytura dhe kërkesa për operacione shpëtimi.
Agjencia Meteorologjike e Japonisë lëshoi paralajmërim të posaçëm për reshje të dendura në disa zona të prefekturave Ishikawa dhe Toyama, duke u kërkuar banorëve të evakuohen ose të ndërmarrin menjëherë masa për të garantuar sigurinë e tyre, për shkak të kushteve që paraqesin rrezik për jetën.
Paralajmërimi i Nivelit 5, niveli më i lartë për reshjet e dendura dhe që nënkupton se një fatkeqësi ka shumë gjasa të ketë ndodhur ose është e afërt, u shpall për disa komuna, përfshirë Himi në prefekturën Toyama dhe Hakui, Shika, Hodatsushimizu dhe Nakanoto në prefekturën Ishikawa.
Banorëve iu bë thirrje të respektojnë udhëzimet për evakuim të autoriteteve lokale dhe të vazhdojnë të jenë vigjilentë ndaj rrezikut të rrëshqitjeve të dheut. Rreth 180 mijë njerëz në pesë komuna të dy prefekturave u udhëzuan të ndërmarrin masa për mbrojtjen e tyre.
Në Himi, një burrë rreth të 50-ave, pjesëtar i një njësie lokale zjarrfikëse, i tha agjencisë Kyodo News përmes telefonit se një lumë kishte dalë nga shtrati dhe se disa automjete ishin përmbytur.
Sipas qeverisë së prefekturës Ishikawa, deri në atë moment nuk kishte raportime për viktima.
Gjatë 12 orëve deri në orën 07:20, në Himi dhe Hakui ranë mbi 300 milimetra shi, ndërsa në Hodatsushimizu u regjistruan mbi 200 milimetra, duke vendosur rekorde të reja të reshjeve në secilin prej këtyre lokaliteteve.
Sipas Agjencisë Meteorologjike të Japonisë, një front atmosferik shtrihet drejt lindjes nga Deti i Japonisë, përmes pjesëve veriore dhe lindore të vendit, dhe pritet të lëvizë drejt jugut deri të premten. Kushtet atmosferike pritet të bëhen jashtëzakonisht të paqëndrueshme për shkak të një mase ajrore të ftohtë dhe një ultësire barike.
Për periudhën 24-orëshe deri në mesditën e së premtes, agjencia parashikon deri në 200 milimetra reshje në rajonin Hokuriku, ndërsa në rajonet Kanto-Koshin dhe Tokai mund të bien deri në 150 milimetra shi.
Reshje të dendura kanë goditur gjithashtu edhe prefekturën Niigata, e cila kufizohet me Toyaman.
Më herët gjatë këtij muaji, një paralajmërim i Nivelit 5 ishte shpallur edhe në disa komuna të prefekturës Chiba, për shkak të reshjeve të dendura që shkaktuan përmbytje dhe lanë 13 persona të vdekur. Përmbytjet bllokuan gjithashtu automjete në rrugë në të gjithë prefekturën, ndërsa në një moment rreth 2.500 automjete ishin braktisur.
