Guardia Civil po heton rastin, ndërsa hetuesit aktualisht po anojnë nga mundësia e një aksidenti.
Guardia Civil po hetonte të mërkurën vdekjen e një çifti irlandez, 50 dhe 45 vjeç, të cilët u gjetën pa shenja jete pranë xhakuzit të vilës luksoze që kishin marrë me qira për pushime verore në Cullera, në provincën e Valencias.
Trupat u gjetën nga dy fëmijët e tyre të mitur, 14 dhe 15 vjeç, të cilët i shoqëronin në udhëtim. Adoleshentët njoftuan një fqinj, i cili më pas telefonoi numrin e emergjencës 112.
Policët e parë që hynë në banesë, nga Policia Lokale, nuk vunë re shenja dhune dhe as shenja që mund të tregonin për një grabitje. Megjithatë, një ekzaminim më i hollësishëm zbuloi prerje të vogla në trupat e viktimave, çka hapi edhe hipotezën se mund të bëhej fjalë për vrasje.
Gjykatësi hetues në Sueca, Valencia, i cili mori përsipër çështjen, vendosi sekret hetimor. Hetimet i janë kaluar ekipit të Policisë Gjyqësore për Vrasjet pranë Guardia Civil.
Tre familjarë të fëmijëve, të cilët mbërritën gjatë natës në Alicante nga Irlanda, morën përsipër kujdesin për ta.
Në pritje të rezultateve të autopsisë, e cila iu krye viktimave të mërkurën në Institutin e Mjekësisë Ligjore të Valencias, hipoteza kryesore e hetimit po anon megjithatë nga mundësia që vdekja të ketë qenë pasojë e një aksidenti tragjik dhe të pazakontë, ndoshta të lidhur me ndonjë defekt të sistemit mekanik të xhakuzit, siç raportoi gazeta “Las Provincias”.
Prerjet ose gërvishtjet, të cilat ishin veçanërisht të dukshme në njërin prej trupave, mund të jenë shkaktuar në këtë skenar nga përpjekjet e partnerit për ta nxjerrë trupin nga uji.
Kur mbërritën hetuesit, uji kishte një ngjyrë të pazakontë dhe u morën mostra për analiza.
Megjithatë, hetuesit nuk i kanë përjashtuar hipotezat e tjera.
Ngjarja ndodhi në kompleksin Colinas del Sol, një zonë ekskluzive në pjesën më të lartë dhe më të shtrenjtë të urbanizimit Cap Blanc, e ngritur në malin e Cullera-s dhe me pamje panoramike nga Gjiri i Valencias.
Hyrja e kompleksit mbrohet nga një portë e madhe e zezë dhe një kamerë sigurie, përballë së cilës të mërkurën qëndronin disa gazetarë.
Nga pjesa perëndimore e perimetrit të shtëpisë, drejt malit, mund të shihej shiriti me të cilin Guardia Civil kishte vulosur derën. Pranë saj, përmes një dritareje të madhe, dukeshin katër palë këpucë.
Grilat pjesërisht të ulura të katit të sipërm lejonin të shiheshin çarçafët e çrregulluar të një krevati.
Në internet, tri vilat e kompleksit Colinas del Sol jepen me qira për një çmim prej 450 deri në 520 euro për natë, në varësi të datës.
Zona ndodhet larg zhurmës së qendrës së qytetit dhe, sipas banorëve, zakonisht është shumë e qetë.
Kjo qetësi u prish në orët e para të pasdites së të martës, kur mbërritën disa automjete policie dhe një ambulancë.
Kështu e kujton ngjarjen Virtu, e cila prej 20 vjetësh i kalon pushimet verore në një shtëpi ngjitur me kompleksin rezidencial.
“Deri në atë moment nuk kishim dëgjuar asgjë. Këtu ishin nipërit e mi dhe bëjnë shumë zhurmë. Djali im, i cili është infermier, u afrua për të pyetur nëse mund të ndihmonte me diçka, por i thanë: ‘Nuk ka më asgjë për të bërë’.”
Gruaja thotë se tri banesat janë pronë e një shtetasi polak, i cili ua jep me qira kryesisht turistëve të huaj.
Cullera ka rreth 24.600 banorë, por gjatë verës popullsia arrin afërsisht në 150.000 njerëz.
Gruaja e vdekur ishte me origjinë nga qarku Monaghan – një nga tre qarqet që i përkisnin provincës historike veriore të Ulsterit dhe që sot bën pjesë në Republikën e Irlandës, jo në Mbretërinë e Bashkuar.
Familja e saj është “shumë e njohur” atje dhe lajmi për vdekjen e saj ka shkaktuar tronditje të madhe, sipas mediave irlandeze, raporton Daniel Postico nga Londra.
Gruaja kishte më shumë se një dekadë që jetonte dhe punonte në Angli.
Bashkëshorti i saj, 50 vjeç, ishte shtetas i një vendi të Oqeanisë.
Ministria irlandeze e Punëve të Jashtme deklaroi se ishte “në dijeni të rastit” dhe se i kishte ofruar familjes ndihmë konsullore.
Fëmijët e çiftit, të cilët sipas burimeve të hetimit ndodheshin në banesë në kohën kur ndodhën vdekjet, u gjetën nga policia në gjendje shoku dhe u asistuan nga një psikolog i Kryqit të Kuq.
Fillimisht u mendua që ata të transferoheshin në një qendër pritjeje për të mitur të administratës rajonale të Generalitat-it dhe u ndërmorën procedura që të dërgoheshin në qendrën e Alborache-s, rreth 80 kilometra në veriperëndim të Cullera-s, po në provincën e Valencias.
Megjithatë, po atë pasdite, të miturit kontaktuan me telefon një xhaxha që jeton në Irlandë.
Vetëm pak orë më vonë, gjatë natës, tre familjarë mbërritën në aeroportin L’Altet të Alicante-s.
Bashkia e Cullera-s vendosi që adoleshentët të mos dërgoheshin në qendrën e pritjes, por të mbeteshin nën kujdesin e një punonjëseje sociale dhe një psikologeje të shërbimeve sociale të bashkisë deri në mbërritjen e familjarëve.
Bashkia dërgoi një taksi për t’i marrë familjarët në aeroport dhe i strehoi ata së bashku me dy fëmijët në një hotel të qytetit bregdetar.
Të mërkurën, ata vazhdonin të qëndronin atje, në pritje të lajmeve që mund të sqarojnë ngjarjen e pazakontë./EL PAÍS
