Kanë dalë në dritë detaje të reja nga dëshmia e Alihan Kurişit, i cilësuar si drejtues i një organizate kriminale turke. Kuriş deklaroi se të ardhurat e tij mujore janë rreth 380 mijë lira turke.
Alihan Kuriş, i njohur në opinionin publik si udhëheqës i komunitetit Süleymancılar dhe i arrestuar së fundmi nën akuza si “korrupsion” dhe “pastrim parash”, ka dhënë dëshminë e tij para autoriteteve.
Në fillim, Kuriş pretendoi se të ardhurat e tij mujore janë rreth 380 mijë lira. Më pas ai u pyet për hollësitë lidhur me një shtëpi trekatëshe, një truall, pjesë pronësie në një zyrë dhe ortakëri në kompani.
Kuriş deklaroi se, përveç pasurive të paluajtshme të trashëguara nga babai, zotëron një pjesë në një ndërtesë zyrash në Erenler të Sakaryas, një shtëpi trekatëshe në pronësi të tij në Çamlıca, një truall prej rreth 450 metrash katrorë në Kısıklı, në bashkëpronësi me anëtarët e familjes, si dhe një Mercedes të vitit 2008.
Ai pretendoi gjithashtu se, me sa mbante mend, në llogarinë e tij personale bankare kishte rreth 650 mijë lira turke.
Në mbrojtjen e tij, Kuriş deklaroi:
“Unë nuk i pranoj akuzat. Nuk i kam dhënë askujt urdhra apo udhëzime lidhur me akuzat që më janë drejtuar. Të ardhurat e mia mesatare janë rreth 380 mijë TL. Këto përbëhen nga paga që marr nga kompania dhe të ardhurat nga qiraja. Hilmi Tuna Kuriş është vëllai im dhe aktiviteti ynë i përbashkët tregtar vazhdon.
Personin me emrin Fahri Candemir e njoh nga aktivitetet e fondacionit. Përveç kësaj, ai merret me mirëmbajtjen e varrit të gjyshit tim. Për këtë arsye, unë dhe vëllai im bëjmë pagesa të vogla për këtë mirëmbajtje. Personi me emrin Osman Aslanali është fqinj i imi nga Stambolli.
Ari që u gjet në shtëpinë time përbëhet nga stolitë e martesës së bashkëshortes sime dhe sendet tona prej ari. Ka edhe stoli që u janë dhuruar fëmijëve të mi. Të gjitha këto janë kursime të familjes sime.”
Kuriş deklaroi gjithashtu se zotëron 51 për qind të aksioneve të kompanisë Altun Mimarlık İnşaat dhe se në të kaluarën kishte pasur 49 për qind të aksioneve në ELF Yapı.
Një pjesë e rëndësishme e marrjes në pyetje lidhej me kompaninë Arden Gıda, ku Kuriş kishte qenë më parë ortak, por më pas ia kishte transferuar aksionet vëllait të tij, Hilmi Tuna Kuriş.
Sipas raportit të MASAK-ut, vëllimi i transaksioneve bankare të Arden Gıda kishte arritur në 6 miliardë e 520 milionë e 264 mijë lira turke gjatë periudhës 2017–2026.
Vetëm shitjet bruto të kompanisë gjatë vitit 2025 kishin arritur në 1 miliard e 575 milionë lira.
Në vëllimin e blerjeve dhe shitjeve binin veçanërisht në sy vitet 2020 dhe 2022.
Gjatë së njëjtës periudhë, në llogaritë e Arden Gıda ishin depozituar 76 milionë e 537 mijë lira në para të gatshme, ndërsa përmes institucioneve të parasë elektronike dhe pagesave ishin regjistruar transferta hyrëse në vlerë totale prej rreth 52 milionë e 381 mijë lirash.
Rreth 52 milionë e 374 mijë lira nga kjo shumë rezultonte se ishin realizuar përmes SİPAY-it, në 273 transaksione.
Një nga marrëdhëniet tregtare me vëllimin më të madh të Arden Gıda ishte ajo me kompaninë Akdeniz Toros Et ve Et Mamulleri.
Sipas të dhënave bankare për periudhën nga viti 2017 deri në qershor 2026, vëllimi i transaksioneve ndërmjet dy kompanive ishte rreth 339,6 milionë lira turke.
Ndërkohë, u regjistrua se vetëm gjatë vitit 2025, Arden Gıda kishte blerë mallra dhe shërbime nga kjo kompani në vlerë prej 391 milionë e 215 mijë lirash.
Kur Kuriş u pyet për drejtuesit e Akdeniz Toros, ai deklaroi:
“Unë jam klient i produkteve të tyre. Përtej kësaj nuk kam ndonjë informacion tjetër dhe nuk i njoh drejtuesit e kompanisë.”
Ai shtoi:
“Siç mund të shihet edhe në regjistrat zyrtarë, unë i kam transferuar të gjitha aksionet që zotëroja në Arden Gıda në korrik të vitit 2021. Të gjitha të dhënat e përmendura dhe të interpretuara në raportin e MASAK-ut i përkasin vitit 2023 dhe periudhës pas tij.”
Kuriş argumentoi se parregullsitë e pretenduara kishin ndodhur në vitin 2022 dhe më pas dhe se, për rrjedhojë, ishte e pamundur që ai të kishte dijeni ose të ishte dëshmitar i këtyre transaksioneve.
Detaje të tjera pritet të bëhen publike.
Çfarë dihet për hetimin?
Ministri i Drejtësisë Akın Gürlek dhe ministri i Brendshëm Mustafa Çiftçi kanë theksuar se hetimi nuk ka lidhje me aktivitetet fetare.
Edhe në deklaratën e Kryeprokurorisë thuhet se hetimi po zhvillohet mbi bazën e transaksioneve të dyshimta financiare.
Sipas të dhënave të hetimit, janë identifikuar 32 kompani që vlerësohet se kanë lidhje financiare dhe tregtare me strukturën që autoritetet e cilësojnë si organizatë kriminale.
Mes tyre ndodhen kompani si Armine Giyim, Ayakkabı Dünyası dhe Verona Ev Tekstil, që veprojnë në sektorë të ndryshëm, nga ndërtimtaria dhe ushqimi, deri te argjendaria, transporti detar dhe arsimi.
Pretendohet gjithashtu se janë kryer transferta të mëdha parash jashtë vendit.
Sipas kontrolleve të MASAK-ut, është konstatuar se më shumë se 100 miliardë lira turke janë transferuar jashtë vendit përmes metodave të ndryshme.
Ministri i Brendshëm Mustafa Çiftçi deklaroi në një intervistë për NTV se, pasi Alihan Kuriş mori drejtimin në vitin 2016, “aktivitetet filluan të zhvilloheshin në mënyrë më të fshehtë”.
Ai tha se komuniteti kishte ndërtuar në Këln një seli qendrore me vlerë 70 milionë dollarë dhe se autoritetet vlerësojnë se aktivitetet mund të zhvendoseshin atje.
Çiftçi shtoi se për operacionin ishte punuar prej një kohe të gjatë.
Nga kasaforta dolën 200 kilogramë shufra ari
Mes personave të kërkuar në kuadër të hetimit ishte edhe vëllai i Alihan Kurişit, Hilmi Tuna Kuriş, i cili ndodhej në arrati.
Gjatë operacioneve të zhvilluara në disa adresa, në njërën prej tyre u gjetën 200 kilogramë ar në shufra, burimi i të cilit nuk ishte përcaktuar.
U njoftua se vlera e tregut e arit të sekuestruar ishte rreth 1,34 miliardë lira turke.
Raporti i MASAK-ut: 66 miliardë lira qarkullim parash
Në raportin e MASAK-ut të përgatitur për Alihan Kurişin kishte edhe hollësi të tjera që tërhiqnin vëmendjen.
Në raportin prej 168 faqesh thuhej se në kompanitë që vlerësohej se ishin të lidhura me organizatën ishte konstatuar një qarkullim financiar që tejkalonte 66 miliardë lira turke.
Në raport binte në sy gjithashtu një dalje parash prej 8 miliardë lirash vetëm nga një kompani.
Njëkohësisht thuhej se duhej të sqarohej burimi i hyrjeve të mëdha të parave të gatshme.
Një tjetër element i raportit të MASAK-ut ishte dendësia e lidhjeve në qarkullimin financiar ndërmjet kompanive.
Në raport bëhej ky vlerësim:
“Është krijuar dyshimi se transaksionet financiare, burimi i të cilave konsiderohet i dyshimtë, mund të jenë realizuar si rezultat i një veprimtarie të organizuar.”/NTV
