Nga Barak Ravid
Diplomatë amerikanë u takuan gjatë fundjavës me përfaqësues të Huthive në Ambasadën e SHBA-së në Oman, ku diskutuan për tensionet në Detin e Kuq, konfirmoi një burim rajonal i njohur me bisedimet.
Pse ka rëndësi: Takimi në Muskat, i zhvilluar me ndërmjetësimin e qeverisë së Omanit, u përqendrua në ruajtjen e armëpushimit mes SHBA-së dhe Huthive dhe në garantimin e lundrimit të lirë përmes Ngushticës Bab al-Mandeb, tha burimi.
Uashingtoni ndodhet në një pozitë delikate: kërkon të mbajë të hapur një nga rrugët më të rëndësishme detare të rajonit, pa u përfshirë drejtpërdrejt në konfliktin mes Arabisë Saudite dhe Huthive të mbështetur nga Irani. Deri tani, SHBA-ja i ka refuzuar kërkesat saudite për përfshirje ushtarake.
Departamenti i Shtetit nuk pranoi të komentonte.
Zhvillimet kryesore: Sipas burimit, SHBA-ja u përfaqësua në takim nga diplomatë të ambasadës, ndërsa ambasadori nuk ishte i pranishëm.
Përfaqësuesit e Huthive theksuan se duan vazhdimin e armëpushimit të arritur me SHBA-në në maj të vitit 2025.
Ata thanë gjithashtu se sulmet e tyre kanë në shënjestër vetëm anijet saudite, në kuadër të luftimeve të rinovuara mes dy palëve. Në të njëjtën kohë, u zotuan se do të respektojnë lirinë e lundrimit për të gjitha anijet e tjera që kalojnë përmes Ngushticës Bab al-Mandeb.
Reuters raportoi i pari për zhvillimin e këtij takimi.
Çfarë po thonë: Të hënën, një ditë pas takimit, zëvendëspresidenti Vance konfirmoi se SHBA-ja po zhvillon bisedime të drejtpërdrejta me Huthit.
“Ne kemi zhvilluar gjithashtu bisedime të drejtpërdrejta me vetë Huthit, ndaj mendojmë se e kemi situatën nën kontroll”, u tha ai gazetarëve.
Në prapaskenë: Sekretari i Shtetit Rubio bisedoi të martën me ministrin e Jashtëm të Omanit, Sayyid Badr al-Busaidi, për përpjekjet për uljen e tensioneve në rajon, sipas Departamentit të Shtetit.
Telefonata u zhvillua pas disa javësh tensionesh mes SHBA-së dhe Omanit. Presidenti Trump kishte kërcënuar se do ta bombardonte Omanin për shkak të bisedimeve që ky vend kishte zhvilluar me Iranin për Ngushticën e Hormuzit.
Gjendja në terren: Luftimet mes Huthive dhe Arabisë Saudite janë intensifikuar ditët e fundit. Huthit kanë kryer një sulm me dron në drejtim të qytetit të shenjtë të Mekës dhe kanë lëshuar raketa drejt qyteteve të tjera saudite.
Ata vazhdojnë të kontrollojnë zonën bregdetare dhe disa ishuj në Ngushticën Bab al-Mandeb.
Arabia Saudite, nga ana e saj, ka shtuar sulmet ajrore kundër Huthive në Jemen. Megjithatë, forcat që mbështet në terren deri tani nuk kanë arritur të ndërmarrin një kundërofensivë efektive tokësore./Axios.com
