Ndihma shtesë ushtarake mbrojtëse vjen pas intensifikimit të sulmeve të Houthive
Nga Damien McElroy
Londër
Avionë luftarakë Typhoon të Forcave Ajrore Mbretërore britanike (RAF) do të dislokohen për të mbrojtur qytetet dhe infrastrukturën e Arabisë Saudite nga sulmet ajrore të milicisë Houthi të Jemenit, e mbështetur nga Irani.
“Mbretëria e Bashkuar do të kryejë misione mbrojtëse kundërajrore për të mbështetur mbrojtjen e qyteteve saudite dhe të infrastrukturës kritike kombëtare nga sulmet ajrore, duke përdorur avionët luftarakë Typhoon të RAF-it”, thuhej në një deklaratë zyrtare të publikuar të martën.
“Këta avionë do të operojnë në rol mbrojtës dhe nuk do të kryejnë sulme ofensive kundër Houthive.”
Mbretëria e Bashkuar do të sigurojë gjithashtu një avion transportues Atlas A400M me kapacitet për transport të ngarkesave të rënda, për zhvendosjen e pajisjeve brenda Arabisë Saudite, ndërsa këshilltarë ushtarakë britanikë do të mbështesin homologët e tyre sauditë në terren.
Në shtator, Britania njoftoi se do t’i ofronte Arabisë Saudite ndihmë shtesë ushtarake mbrojtëse pas rifillimit të sulmeve të Houthive, duke përfshirë edhe një avion RAF Voyager për furnizim me karburant në ajër. Ai njoftim nuk përfshinte mbështetje me avionë luftarakë.
Në mars, Downing Street njoftoi se katër avionë luftarakë do të dërgoheshin në rajon për të ofruar mbulim mbrojtës ndaj raketave iraniane. Ky ishte një zgjerim i pranisë britanike, me avionët që iu bashkuan katër Typhoonëve të dislokuar tashmë në Katar për të “ofruar mbështetje të mëtejshme mbrojtëse për aleatët rajonalë që ndodhen nën sulm nga Irani”.
Sulmet e Houthive janë intensifikuar në Arabinë Saudite gjatë javëve të fundit, ndërsa autoritetet në Jemen thanë të hënën se një sulm ndaj një kampi stërvitor të forcave qeveritare të sigurisë kishte vrarë 58 persona.
Përshkallëzim i patolerueshëm
“Sulmet e vazhdueshme të Houthive ndaj aleatit tonë, Arabisë Saudite, janë absolutisht të neveritshme”, tha sekretari britanik i Mbrojtjes, Wes Streeting. “Në veçanti, goditja e aeroportit të Riadit tregon se deri ku janë të gatshëm të shkojnë Houthit për ta përshkallëzuar situatën në rajon.”
Sulmet ndaj aeroportit të Riadit kanë vrarë më shumë se një duzinë personash dhe kanë shkaktuar ndërprerje të fluturimeve gjatë tetorit, ndërsa gjatë konfliktit janë goditur gjithashtu selia e gjigantit të naftës Saudi Aramco në Dhahran dhe një tubacion që përshkon vendin. Alarmet për sulme ajrore u aktivizuan në kryeqytetin saudit të hënën në mbrëmje, duke dëshmuar se rreziqet e sigurisë vazhdojnë.
“Përpjekjet e Houthive për të destabilizuar rajonin dhe për të cenuar sigurinë dhe stabilitetin e Lindjes së Mesme janë të papranueshme”, thuhej më tej në deklaratën e Ministrisë së Mbrojtjes.
“Kjo sjellje e papërgjegjshme e thellon krizën tashmë shkatërrimtare humanitare në Jemen dhe është në interesin kombëtar ekonomik dhe të sigurisë së Mbretërisë së Bashkuar që ata të mos kenë sukses.
“Përshkallëzimi i dhunës në Gjirin Persik mund të ketë pasoja serioze edhe brenda Mbretërisë së Bashkuar – duke rritur koston e jetesës, duke çrregulluar furnizimet me energji dhe duke shtuar kostot për bizneset britanike. Ai po shkakton gjithashtu pasoja shkatërrimtare për popullsinë civile në Jemen.”
Arsenali i Houthive është fuqizuar me zhvillimin e raketës Palestine-2, me rreze veprimi prej 1.800 kilometrash, e cila ka aftësinë të manovrojë ndërsa i afrohet objektivit me shpejtësi prej rreth 6.000 kilometrash në orë, gjë që i mundëson t’u shmanget sistemeve mbrojtëse.
Houthit kanë prezantuar gjithashtu një version me shpërthim në ajër të raketës Badr, për të cilin pretendojnë se shpërtheu pranë një avioni Typhoon brenda Jemenit në fillim të këtij muaji.
Sipas botimit “The Military Balance” të Institutit Ndërkombëtar për Studime Strategjike (IISS), Forcat Ajrore Saudite disponojnë tri skuadrilje me avionë Typhoon dhe tri skuadrilje të tjera me avionët më të vjetër britanikë Tornado.
Typhoon është i pajisur me një top Mauser 27 mm me 150 predha, i cili mund të përdoret për të rrëzuar dronë që lëvizin ngadalë. Megjithatë, raketat lundruese dhe ato balistike janë tepër të shpejta për t’u përballuar me topin.
Mbretëria e Bashkuar ka dërguar gjithashtu sistemin e mbrojtjes ajrore Sky Sabre për të mbrojtur avionët sauditë Typhoon gjatë operacioneve luftarake. (The National)
