Eldi Dizdari, alias Denis Matoshi, është ekstraduar ditën e sotme nga Dubai në Belgjikë. Lajmi është konfirmuar nga ministrja belge e Drejtësisë, Annelies Verlinden.
Ajo është shprehur se Belgjika po tregon se kriminelët e drogës nuk kanë strehë të sigurt.
“Së bashku me Emiratet e Bashkuara Arabe, ne po tregojmë se nuk ka strehë të sigurta për kriminelët e drogës”, ka shkruar Verlinden në një postim në rrjetet sociale.
Eldi Dizdari është dënuar nga drejtësia belge me 10 vite burg, për rolin e tij në aktivitetin e trafikut të drogës. 37-vjeçari është konsideruar si një prej figurave kryesore të organizatës kriminale Kompania Bello.
Ai njihet edhe me pseudonimin “Shqiptari i gjatë” ose “Alduth”. Në Belgjikë, ai do të përballet me vendimin e dhënë nga gjykata e Anversës, e cila e ka dënuar me 10 vite burg.
Grupi ku bënte pjesë Dizdari dhe Dritan Gjika është goditur nga SPAK-u, pasi dyshohet se ka transportuar të paktën 50 tonë kokainë nga Amerika Latine drejt vendeve të Bashkimit Europian.
Në vitin 2020, kur Prokuroria e Posaçme nisi hetimin pasuror ndaj tij, mësoi se Dizdari kishte përfituar një tokë prej 500 m² si dhuratë nga Qefsere dhe Eqerem Grori, si dhe Osman Dervishi, në një prej zonave super të shtrenjta të Tiranës, në rrugën “Dervish Hima”, pranë stadiumit “Air Albania”.
Denis Matoshi u fut në një aeroplan në Emiratet e Bashkuara Arabe të mërkurën dhe u ul disa orë më vonë në aeroportin ushtarak të Melsbroek. Prej andej, ai u transferua menjëherë në një burg belg.
