Elbasani priti edicionin e radhës të Festivalit Ndërkombëtar të Teatrove “Skampa 2026” që do të zgjasë 5 ditë.
Trupa artistike nga Turqia, Moldavia, Tunizia dhe Shtetet e Bashkuara të Amerikës, si dhe trupa shqiptare nga Teatri Eksperimental i Tiranës, Teatri “Skampa” dhe grupet e të rinjve, do të ngjiten në skenë gjatë ditëve të festivalit.
Edicioni i 2026-ës synon të sjellë një dimension të ri përmes përfshirjes së talenteve të reja dhe produksioneve që përcjellin përpjekjet dhe vizionin e brezit të ri të artistëve.
Nata e parë e festivalit nisi me trupën e Teatrit Shtetëror të Izmirit, e cila solli në skenë “Medean”, kryeveprën e Euripidit, me regji të Adonis Filipit.
Shfaqja ndërthuri forcën vizuale me emocionin dhe dramën njerëzore. Në rolin e Medeas interpretoi aktorja me origjinë shqiptare, Asli Kilian.
“Ishte nder të isha këtu dhe të luaja këtu po ashtu për popullin shqiptar. Dhe më pëlqen shumë. është këndshme ta dëgjosh që u pëlqye si e sollëm ne interpretimi. Më pëlqen sepse me një gjuhë tjetër t’u shpjegoje diçka atyre ishte shumë e vështirë, por nëse u pëlqeu, është një dhuratë e madhe për mua”, thotë aktorja Asli Kilian.
Për gjashtë ditë, “Skampa 2026” do ta kthejë Elbasanin në një pikëtakim të artistëve vendas dhe të huaj, duke sjellë në skenë vepra, gjuhë dhe qasje të ndryshme teatrale.
