Instituti i Berlinit për Popullsinë dhe Zhvillimin parashikon që popullsia të bjerë në 81,8 milionë banorë. Dallimet mes rajoneve janë të mëdha.
Sipas një studimi, popullsia e Gjermanisë pritet të tkurret në rreth 81,8 milionë banorë deri në vitin 2045. Këtë e tregon studimi “Gjendja demografike e kombit”, i prezantuar nga Instituti i Berlinit për Popullsinë dhe Zhvillimin. Sipas tij, pak më shumë se dy të tretat e 400 qarqeve dhe qyteteve me status administrativ të barasvlershëm me qarqet në Gjermani duhet të llogarisin me një rënie të popullsisë.
Edhe afro 200 rajone, të cilat deri para pak vjetësh shënonin rritje, pritet të pësojnë tkurrje. Sipas Zyrës Federale të Statistikave, në vitin 2026 në Gjermani jetojnë rreth 83,3 milionë banorë.
Shumë qytete të mëdha pritet të vazhdojnë të rriten
Për këtë studim, Instituti i Berlinit, së bashku me Fondacionin Wüstenrot, analizoi për herë të pestë 400 qarqet dhe qytetet me status administrativ të barasvlershëm me qarqet. Sistemi i vlerësimit në shkallë vendi përfshin 26 tregues nga demografia, ekonomia, arsimi dhe kushtet shoqërore. Pyetja vendimtare nuk është nëse popullsia e Gjermanisë do të rritet apo do të tkurret, por ku do të ndodhë kjo, tha Catherina Hinz, drejtoreshë e Institutit të Berlinit.
Rënia e popullsisë së Gjermanisë në tërësi do të jetë e moderuar, tha Manuel Slupina nga Fondacioni Wüstenrot. Megjithatë, mes rajoneve ka dallime të dukshme. Shumë qytete të mëdha pritet të vazhdojnë të rriten në të ardhmen, ndërsa disa rajone rurale pritet të humbasin një pjesë të konsiderueshme të popullsisë.
Rënia nuk kufizohet vetëm në Gjermaninë Lindore
Sipas studimit, veçanërisht në lindje, zhvillimi i rajoneve po bëhet gjithnjë e më i pabarabartë: 12 nga 20 qarqet dhe qytetet me vlerësimet e përgjithshme më të dobëta ndodhen në Gjermaninë Lindore; në vitin 2019 ishin vetëm pesë. Kështu, zhvillimi pozitiv i viteve 2014–2024 në shumë rajone të Gjermanisë Lindore nuk po vazhdon kudo. Në demografi, ekonomi, arsim dhe kushte shoqërore, hendeku mes rajoneve të suksesshme dhe atyre më të dobëta sot është, në disa raste, i madh.
Dallime të mëdha ka edhe në perëndim. Saarlandi, për shembull, pritet të vazhdojë të humbasë popullsi, ndërsa qytete si Frankfurti mbi Main ose Dyseldorfi pritet të rriten. Mes landeve federale, Bavaria po e thellon gjithnjë e më shumë epërsinë e saj në krye: 18 nga 20 qarqet dhe qytetet e renditura më mirë ndodhen në Bavari. Në vitin 2019 ishin vetëm 12, tha Adrián Carrasco Heiermann nga Instituti i Berlinit./Tagesspiegel (dpa)
