Aktori Jerry Adler ka ndërruar jetë në moshën 96 vjeçare.
Vdekja e tij u konfirmua nga familja dhe miku i tij, Frank J. Reilly, i cili e përshkroi Adlerin si “aktorin e madh”.
Adler pati një karrierë të pasur në teatër dhe u shfaq në film dhe televizion që nga fillimi i viteve 1990, duke marrë pjesë në produksione si Manhattan Murder Mystery të Woody Allen, Mad About You, Rescue Me, The Good Wife dhe Transparent.
Roli i tij më i famshëm mbetet Herman ‘Hesh’ Rabkin në serialin ikonik të HBO-së The Sopranos, ku shërbente si këshilltar i besuar i Tony Soprano. Ai debutoi në episodin pilot dhe vazhdoi deri në sezonin e gjashtë dhe të fundit në vitin 2007.
Më pas Adler pati një rol tjetër të madh si Howard Lyman në dramën ligjore The Good Wife. Ai luajti në 30 episode nga viti 2011 deri në sezonin e fundit të shfaqjes në 2016.
Adler u rikthye në këtë rol në serinë spin-off The Good Fight për dy episode në vitet 2017 dhe 2018.
Robert King, producenti ekzekutiv i të dyja shfaqjeve, zbuloi në X (Twitter) se aktori do të shfaqej vetëm në një episod të The Good Wife, para se të ftohej për një rol të rregullt në serinë kryesore.
“Jerry Adler vdiq dje. Qëllimi ishte që të shfaqej vetëm në një episod të The Good Wife, por ishte kaq i shkëlqyer sa e ftuam të kthehej për gjashtë vjet të The Good Wife dhe tre vjet të The Good Fight,” shkroi King. “Një nga bashkëpunëtorët tanë më të dashur.”
