Një stuhi e fuqishme dimërore ka paralizuar pjesë të mëdha të veriut të Shteteve të Bashkuara. Era e fortë, reshjet e dendura të borës, shiu i ngrirë dhe temperaturat ekstreme kanë shkaktuar kushte të rrezikshme në rrugë, ndërprerje të energjisë elektrike dhe kaos në jetën publike. Stuhia pasoi një të ashtuquajtur ciklon bombë, një fenomen meteorologjik ku presioni i ajrit bie shumë shpejt, duke shkaktuar erëra me fuqi uragani dhe valë të forta të ftohti e reshjesh dëbore.
Borë deri në 60 centimetra
Sipas shërbimeve meteorologjike, mbi 120.000 familje mbetën përkohësisht pa energji elektrike, veçanërisht në shtetin e Miçiganit. Pemë të rrëzuara dhe linja të dëmtuara energjetike vështirësuan ndërhyrjen e ekipeve të riparimit. Mediat amerikane raportojnë për shtresa dëbore që në disa zona arritën deri në 60 centimetra. Në Liqenet e Mëdha, në kufirin me Kanadanë, dallgët e shkaktuara nga erërat e fuqishme arritën deri në gjashtë metra lartësi.
Kaos në trafik dhe ndërprerje fluturimesh
Autoritetet raportuan dhjetëra aksidente rrugore në disa shtete, përfshirë edhe raste me pasoja fatale. Trafiku ajror u prek rëndë: mijëra fluturime u anuluan ose u vonuan. Në disa zona, temperaturat e ndjera ranë nën –30 gradë Celsius, çka sipas meteorologëve përbën rrezik serioz për jetën.
Gjendje e jashtëzakonshme dhe paralajmërime
Në verilindje të SHBA-së, përfshirë shtetin e Nju Jorkut, autoritetet kanë shpallur gjendje emergjente dhe u kanë bërë thirrje qytetarëve të shmangin udhëtimet e panevojshme. Sipas autoriteteve, në disa zona ka rënë sasia më e madhe e borës në katër vitet e fundit.
Meteorologët paralajmërojnë se kushtet ekstreme të motit mund të vazhdojnë edhe në ditët në vijim, ndërsa ekipet e emergjencës mbeten në gatishmëri të plotë për të përballuar situatën./TetovaNews
