Gastroenterologu dr. Saurab Seti ka ndarë shtatë këshilla të thjeshta për lehtësimin e fryrjes së barkut, të cilat secili mund t’i zbatojë në shtëpi.
Fryrja zakonisht shkaktohet nga grumbullimi i gazrave në zorrë, por mund të jetë edhe pasojë e problemeve të tretjes, si kapsllëku ose intoleranca ushqimore. Edhe pse në shumicën e rasteve mund të zgjidhet me ndryshime të thjeshta në stilin e jetesës, këshillohet të kërkohet ndihmë mjekësore nëse fryrja zgjat më shumë se tri javë, pasi mund të tregojë një problem më serioz.
Dr. Seti, i cili ndiqet nga mbi 1.4 milionë njerëz në Instagram, thotë:
“Jam gastroenterolog i certifikuar dhe ja shtatë mënyra të thjeshta për të luftuar fryrjen.”
1. Hani ngadalë dhe përtypeni mirë ushqimin
Sipas dr. Setit, ngrënia e shpejtë çon në gëlltitjen e ajrit, i cili grumbullohet në stomak dhe shkakton fryrje. Ai këshillon që ushqimi të përtypet mirë dhe që piruni të ulet mes kafshimeve, në mënyrë që të ngadalësohet ritmi i të ngrënit dhe të ndihmohet tretja.
2. Shmangni pijet e gazuara
Pijet e gazuara, përfshirë ujin mineral dhe birrën, çlirojnë dioksid karboni në zorrë. Ky gaz grumbullohet dhe shkakton ndjesi fryrjeje dhe presioni. Në vend të tyre, rekomandohet uji i thjeshtë ose çajrat bimorë, të cilët mund të ndihmojnë në lehtësimin e simptomave.
3. Shmangni ëmbëlsuesit artificialë
Ëmbëlsuesit artificialë si sorbitoli, ksilitoli dhe maltitoli përmbajnë alkoolë sheqeri që fermentohen në zorrën e trashë. Trupi i tret me vështirësi, duke shkaktuar gazra dhe fryrje. Për këtë arsye, produktet “pa sheqer” apo “dietike” shpesh shkaktojnë shqetësime dhe duhen shmangur nëse keni ndjeshmëri.
4. Rrisni marrjen e fibrave
Ushqimet e pasura me fibra – drithërat integrale, frutat, perimet, bishtajoret dhe arrorët – ndihmojnë në përmirësimin e tretjes. Megjithatë, rritja e fibrave duhet bërë gradualisht. Shtimi i menjëhershëm mund ta përkeqësojë fryrjen. Dr. Seti këshillon që fibrat të shtohen ngadalë dhe të shoqërohen me 2–3 litra ujë në ditë.
5. Ecni pas ngrënies
Edhe pse tundimi për t’u shtrirë pas një vakti të bollshëm është i madh, kjo mund ta përkeqësojë fryrjen. Shtrirja nxit refluksin dhe ndjenjën e rëndesës. Një shëtitje e lehtë pas ngrënies ndihmon tretjen dhe lëvizjen e gazrave nëpër zorrë. Edhe 10 minuta ecje janë të mjaftueshme.
6. Kushtojini vëmendje sasisë së ushqimit
Teprimi me ushqim është një nga shkaqet më të zakonshme të fryrjes. Vakte shumë të mëdha e zgjerojnë stomakun dhe e ngadalësojnë tretjen. Zgjidhja është e thjeshtë: porcione më të vogla, të shpërndara gjatë ditës.
7. Menaxhoni stresin
Ndonjëherë, shkaku i fryrjes nuk është ushqimi, por stresi. Stresi aktivizon reagimin “lufto ose ik”, i cili ndikon negativisht në sistemin tretës dhe shkakton gazra, dhimbje dhe parehati. “Stresi shtrëngon zorrët dhe përkeqëson fryrjen,” thotë dr. Seti. Ai rekomandon teknika si frymëmarrja e thellë, meditimi ose pushime të shkurtra gjatë ditës./TetovaNews
