Prefektura e Stambollit dhe Qendra e Koordinimit të Fatkeqësive (AKOM) kanë lëshuar paralajmërim për reshje bore në qytet, duke njoftuar se temperaturat do të bien deri në 0 gradë Celsius, ndërsa 19 rrethe do të preken drejtpërdrejt nga moti i ftohtë.
Sipas njoftimit zyrtar, reshjet do të nisin që sonte në formë shiu, ndërsa me rënien e temperaturave gjatë natës pritet të shndërrohen në borë, veçanërisht në zonat veriore dhe në lartësi më të mëdha.
19 rrethe nën paralajmërim për borë
Sipas autoriteteve, reshje bore dhe bore me shi priten në këto rrethe të Stambollit:
Başakşehir, Beylikdüzü, Beşiktaş, Çatalca, Esenler, Sancaktepe, Eyüpsultan, Gaziosmanpaşa, Kağıthane, Sultangazi, Ataşehir, Çekmeköy, Sancaktepe, Sultanbeyli, Ümraniye, Sarıyer, Arnavutköy, Beykoz dhe Şile.
Autoritetet kanë paralajmëruar për ngrirje dhe rrëshqitje në rrugë, veçanërisht gjatë orëve të natës dhe mëngjesit.
Temperaturat bien nën zero
Sipas parashikimeve, moti në Stamboll do të jetë me vranësira dhe reshje gjatë gjithë ditës së nesërme, ndërsa temperaturat pritet të zbresin deri në 0 gradë Celsius, e në disa zona edhe nën zero gjatë natës.
Reshjet do të jenë më intensive në orët e para të mëngjesit, ndërsa temperaturat maksimale gjatë ditës nuk do të kalojnë 5 gradë Celsius.
Paralajmërim për shoferët
Ministria e Transportit ka bërë thirrje që qytetarët të shmangin daljet e panevojshme me automjete, duke kërkuar përdorimin e gomave dimërore dhe pajisjeve shtesë si zinxhirë, blloqe kundër rrëshqitjes dhe mjete të tjera sigurie.
Gjithashtu, është theksuar se në ditët në vijim priten reshje të dendura bore në rajonet e Detit të Zi Perëndimor, Anadollit Qendror, Anadollit Lindor dhe Juglindor.
Autoritetet u bëjnë thirrje qytetarëve të tregojnë kujdes maksimal dhe të ndjekin njoftimet zyrtare për zhvillimet e mëtejshme të motit./TetovaNews
