Një stuhi e fuqishme ka goditur rajonin e Detit të Zi, duke shkaktuar dëme të mëdha materiale. Sipas të dhënave meteorologjike, shpejtësia e erës ka arritur deri në 103 kilometra në orë, ndërsa dallgët e fuqishme kanë shkaktuar përmbytje dhe shkatërrime në disa zona bregdetare.
Në rrethin İnebolu të provincës Kastamonu, dallgët gjigante që u formuan për shkak të stuhisë shkaktuan dëme serioze në vijën bregdetare. Dallgët, që arritën lartësinë deri në 8 metra, dëmtuan rrugën bregdetare në zonën e Rrugës İsmetpaşa, duke rrëzuar pjesë të mureve mbrojtëse dhe duke mbuluar rrugën me rërë dhe gurë.
Për shkak të dëmtimeve, një segment i rrugës İnebolu–Cide u mbyll për qarkullim, ndërsa lëvizja po zhvillohet vetëm në një korsi, nën mbikëqyrjen e autoriteteve.
Dallgët arritën deri pranë ndërtesave të banimit, duke shkaktuar dëme edhe në objektet e Bashkisë së İnebolut si dhe në biznese private përgjatë vijës bregdetare. Ekipet e komunës dhe të shërbimeve rrugore kanë nisur punën për pastrimin e mbeturinave dhe materialeve të sjella nga deti.
Tre anije u fundosën në Samsun
Në qytetin e Samsunit, ku shpejtësia e erës arriti mbi 50 kilometra në orë, dallgët arritën deri në 4 metra lartësi. Sipas informacioneve zyrtare, në Marinën e Atakumit janë fundosur tre anije si pasojë e motit të keq.
Dallgët e fuqishme goditën vijën bregdetare, duke hedhur gurë dhe mbetje në tokë, ndërsa disa mjete lundruese pësuan dëmtime të rënda. Autoritetet vazhdojnë kontrollet për të verifikuar nëse ka anije të tjera të dëmtuara ose të fundosura.
Autoritetet u kanë bërë thirrje qytetarëve të shmangin zonat bregdetare dhe të tregojnë kujdes maksimal derisa kushtet e motit të përmirësohen./TetovaNews
