Pas vizitës në Crans-Montana, presidenti i ri i Konfederatës doli para medieve në Sion.
Ai shoqërohej nga presidenti i Këshillit të Shtetit të Valais-it, Mathias Reynard, nga kolegu i tij, këshilltari shtetëror për Sigurinë, institucionet dhe sportin, Stéphane Ganzer, nga prokurorja e përgjithshme Béatrice Pilloud, nga komandanti i policisë kantonale të Valais-it, Frédéric Gisler, si dhe nga kryetari i Crans-Montana-s, Nicolas Féraud.
Guy Parmelin foli për “një nga tragjeditë më të rënda që ka njohur vendi ynë, një dramë me përmasa të papara. Shumë jetë, veçanërisht të rinj, janë ndërprerë brutalisht.”
Ai përshëndeti kantonet për mobilizimin dhe solidaritetin e treguar, duke falënderuar në veçanti vendet fqinje – Gjermaninë, Italinë dhe Francën – të cilat janë ofruar për të dhënë ndihmë.
“Çfarë kontrasti i tmerrshëm”, tha ai, duke iu referuar një tragjedie që ndodhi në një vend të destinuar për argëtim. Ai u shpreh se mendon veçanërisht për të rinjtë, të cilët duket se janë të shumtë mes viktimave. Familjeve dhe të afërmve u tha: “Dhimbja juaj është edhe dhimbja jonë”.
Flamujt do të qëndrojnë në gjysmështizë, përfshirë edhe në Pallatin Federal, për pesë ditë.
Mathias Reynard, president i Këshillit të Shtetit, tha se është i vetëdijshëm se do të duhet kohë për identifikimin e trupave, “një kohë e tmerrshme” për familjet. Duke përmendur ndihmën e shumtë dhe solidaritetin e kantoneve dhe spitaleve, ai foli për “një dhunë të papërfytyrueshme, në mes të së cilës megjithatë mbetet një dritë, një shpresë”.
Nicolas Féraud, kryetari i Crans-Montana-s, u shprehu familjeve mbështetjen e plotë të komunës.
