Projekti parashikon rikonstruksionin e blloqeve ekzistuese, ndërtimin e objekteve të reja, pajisje moderne mjekësore dhe zgjerimin e shërbimeve shëndetësore
Në Spitalin Klinik të Tetovës kanë nisur përgatitjet për realizimin e një projekti kapital me vlerë rreth 74 milionë euro, i cili synon rikonstruksionin, zgjerimin, pajisjen dhe modernizimin e përgjithshëm të kompleksit spitalor.
Vlera e paralajmëruar e projektit është 4,56 miliardë denarë, përkatësisht rreth 74 milionë euro. Projekti është prezantuar si një nga investimet më të mëdha të planifikuara në infrastrukturën shëndetësore në rajonin e Pollogut.
Koncepti për transformimin e spitalit u prezantua gjatë një vizite ku morën pjesë ministri i Shëndetësisë, Sasho Klekovski, kryetari i Komunës së Tetovës dhe bashkëkryetari i VLEN-it, Bilall Kasami, drejtori i Spitalit Klinik të Tetovës, dr. Erzen Elezi, ushtruesi i detyrës së drejtorit të Fondit të Sigurimit Shëndetësor, Zllatko Perinski, përfaqësues të Ministrisë së Shëndetësisë, si dhe delegacione të Bankës Botërore dhe Bankës Evropiane të Investimeve.
Sipas njoftimeve të publikuara nga drejtuesit institucionalë, projekti ndodhet në fazën e përgatitjes dhe të prezantimit të konceptit. Synimi është që Spitali Klinik i Tetovës të shndërrohet në një institucion më modern, me kapacitete më të mëdha dhe me shërbime më të avancuara për pacientët nga Tetova, rajoni i Pollogut dhe pjesë të tjera të vendit.
Çfarë parashikohet të përfshijë projekti?
Investimi prej rreth 74 milionë eurosh parashikon rikonstruksionin dhe modernizimin e plotë të bllokut të Kirurgjisë dhe të bllokut të Sëmundjeve Interne.
Në kuadër të projektit është paralajmëruar ndërtimi i kapaciteteve të reja spitalore, përfshirë një objekt bashkëkohor për Gjinekologji, Akusheri dhe Neonatologji.
Ministri i Shëndetësisë, Sasho Klekovski, njoftoi se koncepti përfshin edhe një pavijon të ri për Infektologji, Onkologji, Hematologji dhe Psikiatri.
Kryetari i Komunës së Çairit dhe bashkëkryetari i VLEN-it, Izet Mexhiti, deklaroi se janë parashikuar tri objekte të reja: Klinika e Gjinekologjisë, Akusherisë dhe Neonatologjisë, një objekt pesëkatësh që do të strehojë administratën e spitalit dhe dekanatin e Fakultetit të Mjekësisë, si dhe një objekt për Mjekësinë Nukleare.
Projekti parashikon gjithashtu furnizimin e spitalit me pajisje dhe teknologji bashkëkohore mjekësore, vendosjen e sistemeve moderne të teknologjisë së informacionit dhe rregullimin e plotë të kompleksit spitalor.
Gjatë vizitës, ministri Klekovski ka vizituar edhe Repartin e Onkologjisë, i cili, sipas tij, është duke u zgjeruar dhe po përgatitet për pranimin e një numri më të madh pacientësh.
Mbi 200 punësime të reja
Krahas investimeve në infrastrukturë dhe pajisje, Izet Mexhiti deklaroi se gjatë vitit në Spitalin Klinik të Tetovës janë realizuar më shumë se 200 punësime të reja.
Sipas të dhënave të publikuara prej tij, janë punësuar 157 pjesëtarë të stafit mjekësor, 25 punonjës administrativë, 22 specializantë dhe 12 punonjës teknikë.
Ai shtoi se ekipit të spitalit i janë bashkuar edhe dhjetë mjekë të transferuar nga institucione të tjera shëndetësore.
Një zhvillim tjetër i rëndësishëm është hapja për herë të parë e Repartit të Kirurgjisë Torakale, i cili pritet të zgjerojë gamën e ndërhyrjeve dhe të shërbimeve që mund të ofrohen në Spitalin Klinik të Tetovës.
Synohet statusi i Klinikës Universitare
Përfaqësuesit institucionalë e kanë paraqitur investimin si një hap drejt ngritjes së kapaciteteve profesionale, infrastrukturore dhe akademike të spitalit, si dhe drejt afrimit të tij me standardet e një qendre moderne universitare.
Izet Mexhiti deklaroi se objektet e reja, punësimet, specializimet dhe zgjerimi i shërbimeve po krijojnë parakushte që Spitali Klinik i Tetovës të marrë në të ardhmen statusin e Klinikës Universitare.
Megjithatë, statusi i Klinikës Universitare nuk është dhënë ende. Ai mbetet një synim institucional, realizimi i të cilit do të kërkonte plotësimin e kushteve infrastrukturore, kadrovike, profesionale, akademike dhe ligjore.
Drejtori Erzen Elezi tha se investimi do të mundësojë transformimin e spitalit në një institucion më modern, më funksional dhe më pranë nevojave reale të pacientëve.
Bilall Kasami e cilësoi projektin si një nga investimet më të mëdha shëndetësore në vend, me rëndësi jo vetëm për Tetovën dhe rajonin e Pollogut, por edhe për sistemin shëndetësor në nivel shtetëror.
Sipas paralajmërimeve, realizimi i projektit duhet të sjellë kushte më të mira për pacientët dhe personelin shëndetësor, zgjerim të shërbimeve, teknologji më moderne, shkurtim të kohës së pritjes dhe trajtim të një numri më të madh pacientësh në Tetovë.
DEKLARATAT E PLOTA
Erzen Elezi, drejtor i Spitalit Klinik të Tetovës
“Në krye të një vizioni të qartë dhe me një përkushtim të palëkundur ndaj qytetarëve, si drejtor i Spitalit Klinik të Tetovës e konsideroj detyrë dhe përgjegjësi që çdo ditë të punoj për ta transformuar këtë institucion në një qendër moderne, funksionale dhe të denjë për rajonin e Pollogut.
Me angazhim të vazhdueshëm dhe bashkëpunim institucional, Spitali Klinik i Tetovës po hyn në një fazë të re zhvillimi, duke u afruar gjithnjë e më shumë me standardet evropiane dhe me nevojat reale të pacientëve tanë. Projekti historik i investimit prej 74 milionë eurosh për rikonstruksionin, zgjerimin dhe modernizimin e Spitalit Klinik të Tetovës është dëshmi e qartë se vizioni po shndërrohet në realitet.
Sot po realizohen projekte që për dekada kanë qenë vetëm vizion, ndërsa tashmë po marrin formë konkrete. Për mua, çdo investim, çdo përmirësim infrastrukture dhe çdo pajisje e re mjekësore është një hap më pranë kujdesit më cilësor për qytetarët.
Besoj se shëndetësia ndërtohet me përgjegjësi, profesionalizëm, transparencë dhe rezultate të prekshme. Ky është angazhimi im i përditshëm dhe drejtimi në të cilin do të vazhdojmë të ecim, për një Spital Klinik të Tetovës më modern, më të fortë dhe më pranë çdo pacienti.”
Në një njoftim tjetër, Elezi deklaroi:
“Nisin përgatitjet për realizimin e investimit historik prej 74 milionë eurosh për Spitalin Klinik të Tetovës!
Ky është hapi i parë zyrtar drejt transformimit më të madh që ka njohur ndonjëherë ky institucion shëndetësor.
Projekti do të sjellë modernizim të plotë të kapaciteteve, teknologji të avancuar dhe kushte dinjitoze për pacientët dhe stafin mjekësor.
Një vizion i madh që sot hyn në fazën e realizimit dhe që do ta shndërrojë Tetovën në një nga qendrat më moderne shëndetësore në vend.”
Bilall Kasami, kryetar i Komunës së Tetovës dhe bashkëkryetar i VLEN-it
“74 milionë euro për Spitalin Klinik të Tetovës – nga sot kanë nisur përgatitjet për realizimin e këtij projekti kapital!
Së bashku me ministrin e Shëndetësisë, Sasho Klekovski, drejtorin e Spitalit Klinik të Tetovës, Erzen Elezi, përfaqësues të Bankës Botërore dhe të Fondit për Sigurim Shëndetësor, mirëpritëm investimin kapital prej 74 milionë eurosh, i cili do të transformojë dhe modernizojë Spitalin Klinik të Tetovës.
Ky është një ndër projektet më të mëdha shëndetësore në vend, me rëndësi të veçantë jo vetëm për Tetovën dhe rajonin e Pollogut, por për të gjithë shtetin. Ai dëshmon përkushtimin e Qeverisë për të investuar në një sistem shëndetësor modern, duke krijuar kushte më të mira për pacientët dhe stafin mjekësor, sepse shëndetësia cilësore është një e drejtë themelore e çdo qytetari.
Nga sot, zyrtarisht kanë nisur përgatitjet për realizimin e këtij projekti kapital.
Investimi prej rreth 74 milionë eurosh parashikon:
– modernizimin e bllokut të Kirurgjisë dhe atij të Sëmundjeve Interne;
– ndërtimin e kapaciteteve të reja spitalore, përfshirë një objekt të ri për Gjinekologji, Obstetrikë dhe Neonatologji;
– pajisjen me teknologji bashkëkohore mjekësore dhe sisteme moderne të teknologjisë së informacionit;
– rregullimin e plotë të kompleksit spitalor.
Ky projekt do të rrisë ndjeshëm cilësinë e shërbimeve shëndetësore në rajonin e Pollogut, do të shkurtojë kohën e pritjes për pacientët dhe do të ofrojë shërbime më efikase, më moderne dhe më cilësore për të gjithë qytetarët.”
Izet Mexhiti, kryetar i Komunës së Çairit dhe bashkëkryetar i VLEN-it
“Me 74 milionë euro investime dhe mbi 200 punësime të reja, Spitali i Tetovës drejt statusit të Klinikës Universitare.
Brenda vetëm një viti, Spitali Klinik i Tetovës ka hyrë në një fazë transformimi që po e afron me statusin e Klinikës Universitare.
Me një investim prej 74 milionë eurosh, po ndërtohen tre objekte të reja që do ta ndryshojnë rrënjësisht funksionimin e këtij institucioni.
Bëhet fjalë për Klinikën e Gjinekologjisë, Akusherisë dhe Neonatologjisë, objektin pesëkatësh që do të strehojë administratën e spitalit dhe dekanatin e Fakultetit të Mjekësisë, si dhe objektin e Mjekësisë Nukleare.
Transformimi nuk kufizohet vetëm në infrastrukturë. Gjatë këtij viti janë realizuar mbi 200 punësime të reja: 157 pjesëtarë të stafit mjekësor, 25 punonjës administrativë, 22 specializantë dhe 12 punonjës teknikë, ndërsa ekipit i janë bashkuar edhe dhjetë mjekë të transferuar nga institucione të tjera shëndetësore.
Një zhvillim me rëndësi të veçantë është edhe hapja, për herë të parë, e Repartit të Kirurgjisë Torakale, duke zgjeruar ndjeshëm gamën e shërbimeve që ofron spitali.
Nën drejtimin e dr. Erzen Elezit, këto investime, këto kapacitete të reja dhe ky ritëm zhvillimi po krijojnë të gjitha parakushtet që Spitali Klinik i Tetovës të marrë statusin e merituar të Klinikës Universitare.
Ky është një investim në një institucion më të fortë, në shërbime më cilësore për qytetarët dhe në një të ardhme më të zhvilluar për shëndetësinë dhe arsimin mjekësor në Tetovë dhe në gjithë rajonin.”
Sasho Klekovski, ministër i Shëndetësisë
“Është prezantuar koncepti për Spitalin Klinik të Tetovës.
Këtë mëngjes, së bashku me një delegacion të Bankës Botërore dhe të Bankës Evropiane të Investimeve, vizituam Spitalin Klinik të Tetovës, ku prezantuam konceptin për rikonstruksionin, zgjerimin dhe pajisjen e tij të plotë.
Në takim morën pjesë kryetari i Komunës së Tetovës, Bilall Kasami, drejtori i Spitalit Klinik të Tetovës, dr. Erzen Elezi, drejtori i Fondit për Sigurim Shëndetësor, Zllatko Perinski, ndërsa u përfshinë edhe përfaqësues të Ministrisë së Shëndetësisë.
Një spital modern në Tetovë:
– rikonstruksion dhe modernizim i plotë i bllokut të Kirurgjisë dhe bllokut të Sëmundjeve Interne;
– pavijon i ri për Infektologji, Onkologji, Hematologji dhe Psikiatri;
– objekt bashkëkohor për Gjinekologji, Akusheri dhe Neonatologji;
– kushte më të mira për pacientët dhe punonjësit shëndetësorë;
– më shumë shërbime shëndetësore pranë qytetarëve.
Gjatë vizitës e vizitova edhe Repartin e Onkologjisë, i cili tani po zgjerohet dhe po përgatitet për pranimin e më shumë pacientëve.
Për një shëndetësi rajonale më të fuqishme dhe më të barabartë.”/Tetova News
