Pesë adoleshentë kanë humbur jetën dhe katër anëtarë të një familjeje, mes tyre edhe një fëmijë 7-vjeçar, kanë mbetur të plagosur rëndë në një aksident të tmerrshëm në autostradën M9 në Irlandë.
Aksidenti ndodhi rreth orës 03:00 të mëngjesit të së dielës, 16 gusht 2026, në M9, pranë kryqëzimit 3 në Moone, County Kildare. Policia irlandeze, An Garda Síochána, ka konfirmuar se shërbimet e emergjencës ishin njoftuar për një automjet që po lëvizte drejt jugut në pjesën e autostradës të destinuar për trafikun drejt veriut. Midis kryqëzimeve 3 dhe 4 automjeti u përplas ballë për ballë me një makinë tjetër që po udhëtonte në drejtimin e rregullt.
Në automjetin që po lëvizte në kah të kundërt ndodheshin pesë djem adoleshentë. Të pestë humbën jetën në vendin e ngjarjes. Trupat e tyre më pas u dërguan në Naas General Hospital për ekzaminimet pas vdekjes.
Publikohen emrat e pesë viktimave
Familjarë dhe miq i kanë identifikuar viktimat si:
- Jeremy O’Brien, 18 vjeç, nga Carlow;
- Alex McCarthy, 17 vjeç, nga Carlow;
- Joe “Joey” Carthy, 15 vjeç, nga Athy;
- Jack Kennedy, 17 vjeç, nga Athy;
- Kamil Pustkowski, 17 vjeç, nga Limerick.
Sipas “The Irish Times”, Jeremy O’Brien dhe Alex McCarthy ishin kushërinj. Deri në raportimet e fundit të 17 gushtit, Garda ende nuk i kishte publikuar zyrtarisht identitetet e pesë viktimave; emrat ishin bërë publikë nga familjarët, miqtë dhe komunitetet e tyre.
BMW-ja ishte raportuar e vjedhur
Mediat irlandeze raportojnë se pesë të rinjtë ndodheshin në një BMW të zezë që ishte raportuar e vjedhur. Automjeti po lëvizte në drejtim të kundërt në M9 para përplasjes me një Hyundai, në të cilin udhëtonin tre gra dhe një fëmijë.
Sipas informacioneve të publikuara nga “The Irish Times”, BMW-ja nuk ishte duke u ndjekur nga policia në momentin kur ndodhi përplasja. Më herët gjatë natës, rreth orës 02:00, policia kishte tentuar ta ndalonte automjetin në Athy, por drejtuesi nuk ishte ndalur dhe ishte larguar.
Policia po heton të gjitha rrethanat e lëvizjes së automjetit, përfshirë arsyen pse ai kishte hyrë në anën e gabuar të autostradës.
Tre motra dhe një djalë 7-vjeçar në makinën tjetër
Në Hyundai-n që po udhëtonte në drejtimin e rregullt ndodheshin tre motra dhe nipi i tyre.
Sipas mediave irlandeze, Alma Kinsella dhe Niamh Kinsella, të dyja në të 30-at, ndodheshin në pjesën e përparme të makinës. Motra e tyre më e vogël, Ella Hendricken, në të 20-at, ndodhej në sediljen e pasme së bashku me nipin 7-vjeçar.
Alma dhe Niamh Kinsella u dërguan në Tallaght University Hospital, ku raportoheshin në gjendje kritike. Ella Hendricken, e cila fillimisht ishte dërguar në St Luke’s Hospital në Kilkenny, më pas u transferua në St Vincent’s University Hospital me lëndime të rënda. Djali 7-vjeçar po trajtohej në spitalin e fëmijëve në Crumlin, gjithashtu me lëndime serioze.
Familja, nga zona e Carlow, po udhëtonte drejt aeroportit të Dublinit, prej nga do të fluturonte për në Britani për të marrë pjesë në një dasmë familjare.
Policia: Familja po udhëtonte e pafajshme
Komisioneri i Gardës, Justin Kelly, tha se mendimet e tij janë me personat e plagosur dhe theksoi se anëtarët e familjes po udhëtonin normalisht kur u goditën nga automjeti që po vinte në drejtim të kundërt.
Kelly e cilësoi drejtimin e automjetit në anën e gabuar të autostradës si sjellje jashtëzakonisht të papërgjegjshme dhe të rrezikshme. Ai ngriti gjithashtu shqetësimin se në disa raste drejtimi ekstremisht i rrezikshëm i automjeteve bëhet për të fituar vëmendje dhe reagime në rrjetet sociale.
Rasti i është referuar Ombudsmanit të Policisë
Një tjetër zhvillim i rëndësishëm është se rasti i është referuar Fiosrú, Ombudsmanit të Policisë në Irlandë.
Komisioneri Justin Kelly tha se për këtë arsye nuk mund të jepte hollësi për disa nga rrethanat e ngjarjes dhe se An Garda Síochána do të bashkëpunojë plotësisht me hetimin e pavarur.
Referimi është veçanërisht i rëndësishëm pasi policia kishte pasur kontakt me BMW-në përpara aksidentit, ndërsa mediat raportojnë se automjeti nuk po ndiqej nga patrulla në çastin e përplasjes. (
Hetuesit përfunduan ekzaminimin e vendit të aksidentit
Ekspertët e hetimit të aksidenteve rrugore përfunduan ekzaminimin kriminalistik të vendit të ngjarjes. Garda caktoi gjithashtu oficerë ndërlidhës për familjet e personave që ndodheshin në të dy automjetet.
Policia u ka bërë thirrje të gjithë personave që kanë udhëtuar në M9, në të dy drejtimet, ndërmjet orës 02:00 dhe 03:00 të 16 gushtit dhe që posedojnë pamje nga kamerat e automjeteve, t’ua dorëzojnë ato hetuesve.
Rasti i dytë brenda pak ditësh
Tragjedia ka shkaktuar debat të madh në Irlandë për fenomenin e automjeteve që lëvizin qëllimisht në kah të kundërt në autostrada.
Vetëm disa ditë më herët kishte ndodhur një tjetër aksident serioz në autostradën M50, ku një automjet i vjedhur ishte drejtuar në kah të kundërt. Kryeministri irlandez Micheál Martin tha pas tragjedisë në M9 se ky ishte aksidenti i dytë i rëndë brenda pak ditësh i lidhur me drejtimin e një automjeti në anën e gabuar të autostradës. Ai kërkoi që të mos ketë tolerancë ndaj një sjelljeje të tillë.
Ndërkohë, Garda Representative Association ka kërkuar trajnim dhe rregulla më të qarta për policët që përballen me automjete që refuzojnë të ndalen dhe futen në kah të kundërt, duke theksuar rrezikun ekstrem që situata të tilla paraqesin për përdoruesit e pafajshëm të rrugës.
Hetimet për tragjedinë e M9 vazhdojnë, ndërsa katër personat që ndodheshin në Hyundai vazhdonin të trajtoheshin në spital sipas përditësimeve të publikuara gjatë 17 gushtit.
