Nga Juliette Laffont
Në Rusi po ndihet sërish një atmosferë e njohur. Për të shmangur rekrutimin në radhët e ushtrisë, dhjetëra mijëra rusë po largohen përsëri nga vendi. Vetëm gjatë 18 gushtit, 20.000 persona kaluan kufirin tokësor ndërmjet Rusisë dhe Gjeorgjisë, rreth trefishi i numrit të zakonshëm të kalimeve ditore. Ky është një skenar që të kujton shtatorin e vitit 2022, kur 400.000 burra u strehuan jashtë vendit pas shpalljes së mobilizimit të pjesshëm, gjashtë muaj pas pushtimit të Ukrainës.
Megjithatë, këtë herë largimet kanë filluar përpara se të bëhej ndonjë njoftim zyrtar, edhe pse nuk kanë përmasat e eksodit të mëparshëm. Organizata vullnetare Idite Lesom, e cila ndihmon rusët që dëshirojnë t’i shpëtojnë mobilizimit të detyruar, ka regjistruar një rritje të ndjeshme të kërkesave: gjatë vjeshtës, numri i kërkesave për ndihmë është rritur me 50% krahasuar me pranverën.
Përpjekjet për t’i shpëtuar rekrutimit
E njëjta prirje vërehet edhe te organizata joqeveritare Kovcheg, e cila ka regjistruar një rritje të kërkesave për informacion, numri i të cilave është tetëfishuar që nga korriku.
“Krahasuar me vitin 2022, sot po shohim një valë emigrimi më të vogël, por më të përgatitur”, shpjegon themeluesja e organizatës, Anastasia Burakova, për të përjavshmen The Economist.
Në Armeni, një vend që, ashtu si Gjeorgjia, i pranon shtetasit rusë pa vizë, fluksi i të ardhurve që nga pranvera ka qenë aq i madh, saqë presioni mbi tregun e banesave ka shkaktuar një rritje të qirave me rreth 40%.
Këto shifra nuk janë aspak befasuese, duke pasur parasysh thashethemet që qarkullojnë prej muajsh. Në rrjetet sociale po përhapen gjerësisht paralajmërimet për një mobilizim të ri të detyruar. Madje, disa pretendojnë se procesi tashmë ka filluar.
Sipas disa dokumenteve të brendshme të siguruara nga Bloomberg në shtator, zyrtarë të Kremlinit, madje edhe punonjës të qendrave të rekrutimit ushtarak, u kanë këshilluar të afërmve të tyre të largohen nga Rusia gjatë muajve të ardhshëm, ndërkohë që vetë po kërkojnë aktivisht mënyra për të hapur llogari bankare jashtë vendit.
Një zyrtar evropian i sigurisë, i cituar nga Bloomberg, përmend gjithashtu shifrën prej 300.000 burrash të tjerë që mund të mobilizohen nga Moska, një vlerësim që presidenti francez Emmanuel Macron e ka cilësuar si “të besueshëm”.
Ndërkohë, shërbimet ukrainase të inteligjencës parashikojnë një mobilizim edhe më të gjerë. Sipas tyre, të cituara nga Kyiv Post, Rusia planifikon të mobilizojë 600.000 burra të tjerë gjatë viteve 2026 dhe 2027. Edhe shumë blogerë ushtarakë rusë e konsiderojnë të besueshme këtë mundësi.
Një mobilizim më i fshehtë?
Megjithatë, Kremlini i mohon kategorikisht këto pretendime.
“Këto janë absurditete të plota. Bëhet fjalë për një sulm informativ kundër Rusisë”, deklaroi Vladimir Putin në prag të zgjedhjeve të shtatorit.
Por rusët, të mësuar nga përvoja, duket se janë më të prirur të besojnë se sa më kategorikisht autoritetet mohojnë përgatitjen e një mase të pakëndshme, aq më shumë gjasa ka që ajo të ndërmerret.
Në fund të fundit, në vitin 2022, Kremlini kishte mohuar se po përgatiste një mobilizim, vetëm një javë përpara se ta shpallte atë.
Në praktikë, nuk është i nevojshëm asnjë njoftim i ri zyrtar, pasi dekreti i mëparshëm i mobilizimit nuk është shfuqizuar kurrë.
Por pas katër vjetësh lufte, lodhja dhe pakënaqësia po ndihen gjithnjë e më shumë në shoqërinë ruse. Gjatë verës, në Penza, rreth 600 kilometra në lindje të Moskës, shpërthyen protesta pasi disa persona u ndaluan me forcë në mes të rrugës nga rekrutues të veshur me rroba civile, me qëllim dërgimin e tyre në front.
Kategori të reja personash që mund të mobilizohen?
Për të shmangur protesta të reja, vala e ardhshme e mobilizimit mund të zhvillohet në mënyrë shumë më të fshehtë.
Autoritetet e kanë reformuar tërësisht sistemin e rekrutimit ushtarak për të krijuar një mekanizëm mobilizimi që funksionon pa shumë zhurmë.
Fletëthirrjet në letër janë zëvendësuar me një regjistër të vetëm digjital, tashmë plotësisht të integruar me shërbimet tatimore, Ministrinë e Brendshme, dosjet mjekësore, bazat e të dhënave të pronësisë dhe sistemin e kontrollit kufitar.
Sapo lëshohet një fletëthirrje elektronike, personit që e merr i ndalohet automatikisht largimi nga vendi.
Megjithatë, përpara se të dërgohen trupa të tjera në front, duhet të zgjidhen disa çështje të rëndësishme ushtarake. E para ka të bëjë me profilin e personave që do të mobilizohen.
Ushtarët më të rinj, në gjendje më të mirë fizike dhe me arsimim më të lartë do të ishin më efikasë sesa burrat në moshë që Rusia ka rekrutuar gjatë fushatave të mëparshme.
Këtë e kanë dëshmuar edhe ushtarët koreano-veriorë që kanë luftuar për Rusinë: ushtarakët ukrainas i kanë përshkruar ata si dukshëm më këmbëngulës dhe më të aftë sesa këmbësoria ruse.
Aktualisht, “ushtria ruse tërheq kryesisht burra me kualifikim të ulët dhe me perspektiva të kufizuara për të ardhmen”, analizon ekonomisti rus Vladislav Inozemtsev për të përjavshmen The Economist.
Ushtarët marrin një pagë mujore relativisht të ulët, prej 200.000 rublash, një pjesë e madhe e së cilës shpesh përvetësohet nga eprorët e tyre.
Nga ana tjetër, kompensimi që u paguhet familjarëve në rast vdekjeje është shumë i lartë: ai arrin në 15 milionë rubla, më shumë se dhjetëfishi i të ardhurave mesatare vjetore në Rusi.
E përballur me mungesë të rëndë personeli për shkak të humbjeve të mëdha, ushtria ruse po shqyrton mundësinë e ndryshimit të këtij sistemi, duke rritur pagat e rekrutëve dhe duke ulur kompensimin që paguhet në rast vdekjeje.
Përveç rekrutimit brenda Rusisë, Moska duket se po përfiton edhe nga ashpërsimi i politikave të azilit në Evropë dhe në Shtetet e Bashkuara për të rikthyer disa shtetas rusë që ishin larguar nga vendi, zbulon BBC këtë të premte.
Një prej këtyre personave, e dëbuar me forcë nga Shtetet e Bashkuara, pohon, duke u mbështetur edhe në dëshmi të dëshmitarëve, se agjentë të Shërbimit Federal të Sigurisë së Rusisë (FSB) u kanë dorëzuar të gjithë burrave të dëbuar dokumente ushtarake, duke i detyruar të regjistrohen në zyrën lokale të rekrutimit, prej nga të mobilizuarit shpesh dërgohen për të luftuar… në Ukrainë.
Për të rekrutuar sa më shumë njerëz, çdo mjet duket i pranueshëm…(L’Express)
