Nga Enola Richet
Gjermania mund të përfshihet në një konflikt të dhunshëm me Rusinë për shkak të «luftës në hije» që Moska po zhvillon tashmë kundër demokracive europiane. Paralajmërimi vjen nga kreu i Shërbimit Federal të Inteligjencës së Jashtme të Gjermanisë (BND), Martin Jäger, i cili foli gjatë seancës së përvitshme dëgjimore publike të drejtuesve të shërbimeve të inteligjencës në Parlament, të hënën, më 5 tetor. «Gjermania rrezikon të përfshihet në një konflikt të dhunshëm me Rusinë — tentativa për sulm në Lajpcig është vetëm një shembull», vijoi ai, duke theksuar se kërcënimi i sulmeve ndaj objektivave të caktuara në Gjermani mbetej «real dhe i afërt».
Në gusht, në Lajpcig pati një tentativë sulmi me dron ndaj një avioni ukrainas transporti mallrash. Prej disa muajsh, Berlini e akuzon gjithashtu Moskën për shtimin e sulmeve kibernetike, sabotimeve dhe depërtimeve me dronë në territorin e tij. Rusia e Vladimir Putinit vazhdon të mohojë çdo sulm kundër vendeve të NATO-s.
Sipas kreut të BND-së, ky presion në rritje ndaj Gjermanisë dhe Europës dëshmon se lufta në Ukrainë ka hyrë në një fazë të re. Rusia «është e vendosur ta gjunjëzojë Ukrainën këtë dimër», paralajmëroi ai, duke parashikuar sulme të papara deri më tani. Në deklaratat për Politico-n, Martin Jäger vlerëson se Vladimir Putini, përballë kostos ekonomike dhe njerëzore në rritje të luftës, tashmë duhet të arrijë rezultate ushtarake mjaftueshëm të rëndësishme për të justifikuar sakrificat e bëra që prej vitit 2022.
Gjermania, «objektiv kryesor»
Për momentin, asgjë nuk tregon se Moska po përgatit një sulm në shkallë të gjerë ndaj territorit gjerman, saktëson zyrtari. «Megjithatë, Rusia mund të ndërmarrë veprimtari ushtarake me intensitet të ulët, veçanërisht në vendet baltike», parashikon ai. Duke qenë furnizuesja kryesore e ndihmave për Ukrainën, Gjermania duhet të përgatitet për më shumë tentativa frikësimi dhe ndërhyrjeje nga Moska, përfshirë kërcënime bërthamore, shpjegoi ai. Për Martin Jägerin, situata duhet paraqitur qartë: Gjermania është bërë «një pengesë madhore për shtrirjen e fuqisë hegjemoniste të Rusisë në Europë» dhe, për rrjedhojë, «një objektiv kryesor i veprimeve ruse».
Moska i hedh poshtë prej kohësh këto aludime. Të enjten, më 1 tetor, gjatë forumit Valdai në Moskë, Vladimir Putini deklaroi se Rusia nuk kishte «asnjë qëllim për të sulmuar» ndonjë vend europian, duke përsëritur njëkohësisht se do të kundërpërgjigjej në rast agresioni dhe se mund të përdorte arsenalin e saj bërthamor nëse territori i saj kërcënohej.
Europa përgatitet për më shumë sulme hibride
Gjermania nuk është e vetmja që ngre alarmin. Zyrtarët europianë dhe sekretari i përgjithshëm i NATO-s i kanë shtuar denoncimet për intensifikimin e sulmeve dhe veprimeve hibride ruse në territorin e Aleancës transatlantike. Edhe të hënën, më 5 tetor, gjatë një konference për shtyp në Bruksel, përkrah kryeministrit moldav Vasile Tofan, shefja e diplomacisë europiane, Kaja Kallas, denoncoi shtimin e «sulmeve hibride», tentativave për sabotim dhe shkeljeve të hapësirave ajrore që i atribuohen Rusisë.
Ajo përmendi veçanërisht Moldavinë: Ministria e saj e Mbrojtjes pohon se tre dronë depërtuan në hapësirën ajrore të vendit më 30 shtator, ditë gjatë së cilës Rusia ndërmori një fushatë të gjerë sulmesh ndaj infrastrukturës energjetike ukrainase. «Rusia po na vë në provë dhe po vëzhgon me kujdes mënyrën se si e menaxhojmë situatën», përfundoi të hënën kreu i shërbimit gjerman të inteligjencës së jashtme. «Nga këndvështrimi i Kremlinit, edhe shenja më e vogël e hezitimit është një ftesë për ta shtuar më tej presionin ndaj Gjermanisë»./L’Express.fr
