Nga Julien Chabrout
Volodymyr Zelensky është bërë qartazi objektivi i ri i preferuar i Donald Trumpit. Presidenti amerikan akuzoi të dielën, më 18 tetor, homologun e tij ukrainas se “nuk dëshiron t’i japë fund” luftës me Rusinë. “Ai ndoshta nuk ka dashur kurrë [ta bëjë këtë]”, sulmoi presidenti amerikan në platformën e tij Truth Social. “Unë dua që kjo luftë të përfundojë”, shtoi ai në një mesazh të shkruar me shkronja të mëdha, ku justifikoi vendimet e tij të fundit në favor të Moskës.
Sulmet e përsëritura të Donald Trumpit i shkojnë për shtat një udhëheqësi tjetër: Vladimir Putinit. Sipas The Wall Street Journal (WSJ), presidenti rus i ka propozuar kreut të Shtëpisë së Bardhë mbajtjen e një samiti në Kinë për të negociuar një marrëveshje që do t’i jepte fund luftës në Ukrainë me kushte të favorshme për Rusinë. Moska propozon që ky takim trepalësh me Xi Jinpingun të zhvillohet në margjinat e samitit të Bashkëpunimit Ekonomik Azi-Paqësor (APEC), të parashikuar më 18 dhe 19 nëntor në Shenzhen, shkruan WSJ, duke iu referuar personave anonimë të njohur me çështjen.
Volodymyr Zelensky, pra, do të mungonte në këtë samit. Ky format trepalësh përjashton gjithashtu Evropën, të cilën Kremlini e konsideron si pengesën kryesore për fitoren e tij në Ukrainë. Një takim i tillë do të ngjallte, për rrjedhojë, shqetësime të mëdha në kryeqytetet evropiane dhe më gjerë. Ai do të ishte gjithashtu i paprecedentë. Presidenti amerikan e priti në gusht 2025 presidentin rus në Alaskë për një samit dypalësh, por takimi nuk solli asnjë përparim drejt zgjidhjes së konfliktit në Ukrainë.
Një telefonatë Trump-Putin më 9 tetor
Deri tani, as Shtëpia e Bardhë dhe as ambasadat ruse dhe kineze në Uashington nuk kanë reaguar publikisht. Megjithatë, zëdhënësi i Kremlinit, Dmitri Peskov, i konfirmoi WSJ-së se po zhvillohen diskutime për një takim të mundshëm trepalësh. “Për momentin nuk ka ndonjë marrëveshje konkrete për vetë takimin apo për përmbajtjen e tij të mundshme, megjithëse të tri palët e kanë pranuar si të mundshme hipotezën e një takimi të tillë”, deklaroi Dmitri Peskov.
Ideja e këtij formati trepalësh thuhet se është ngritur nga Vladimir Putini gjatë bisedës telefonike që zhvilloi me Donald Trumpin më 9 tetor, i tha gazetës amerikane një ish-oficer i shërbimeve ruse të inteligjencës. Atë ditë, dy udhëheqësit zhvilluan një bisedë gjatë së cilës ranë dakord për një marrëveshje mbi furnizimet me naftë dizel.
Edhe pse duket relativisht pak e mundshme që Xi Jinping dhe Donald Trump të pranojnë një propozim të tillë, pamja e udhëheqësve amerikan, rus dhe kinez duke negociuar fatin e një kombi do të përbënte një sinjal të fuqishëm. Ajo do të forconte gjithashtu ndikimin gjeopolitik të Rusisë. Siç shpjegon WSJ, Moska e sheh një dialog të mundshëm trepalësh si një mënyrë për të konsoliduar vendin e Rusisë në klubin e fuqive të mëdha botërore, një status që Vladimir Putini e ka kërkuar që nga ardhja e tij në Kremlin në vitin 2000.
Për Donald Trumpin, synimi është të paraqesë një zgjidhje diplomatike të këtij konflikti në prag të zgjedhjeve të mesmandatit, midterms, që mbahen më 3 nëntor. Presidenti amerikan kishte premtuar t’i jepte fund kësaj lufte: ai kishte pohuar se konflikti do të përfundonte që në ditën e parë të mandatit të tij të ri. Një premtim elektoral që nuk është përmbushur kurrë, gati dy vjet pas rikthimit të tij në Shtëpinë e Bardhë. Ndërkohë, miliarderi nga Partia Republikane po shton kritikat ndaj Volodymyr Zelenskyt, duke deklaruar ndër të tjera se ishte “më e vështirë” të punohej me të sesa me Vladimir Putinin dhe duke e qortuar Kievin për sulmet ndaj rafinerive ruse.
